Ganzenpen in Amsterdam

Enige jaoren geleden, en dan praot ik weer oaver de veurige eeuw, wodd`n d`r in Vodd`n met, `n an nieuwsgierigheid grenzende belangstelling gekekk-n naor luu uut de grote stad. Laot Ganzenpen no`w ok `n paar dagen naor Amsterdam gegaon weaz-n en zal o-w hierbie-j de ervaring laoten leazen.

Al bie-j binnenkomst in Amsterdam is `t al biezunder inspannend um `t verkeer meister te wodd-n. Fo-i wat `n drukte en wat `n gemier en gemartel um op de juuste plek te komm-n, maor toch met wat hott-n en stoten is `t gelukt, alhoewel de trambane veur mien heurbaar `n handebreed hoger lag dan de rie`jbaan.

In `t hotel angekomm-n rondkiekend of wie-j niet te wiet gereden hadd-n, `t leek wel Afrika, maor verdomd daor zagen wiej `n Hollands ogend dearntjen achter de teunbanke die-j ons `t een en ander uutlei-j oaver `t gebruuk van lift, kamer en `t etten.

Vervolgens de stad bekiek-n um o-w wegwies te maken. As Vodd-nsen kiek ie-j o`w de ogen uut de kop. No-w mo-j begriepen dat Gradus 3-talig is ( Plat, Hollands en deur de neuze) maor of ie`j o`w daormet kunt redd-n in den grote stad völt te betwiefelen.

Sommige luu waorvan Gradus `t vermoeden hef dat `t vertegenwoordigers van de dope-industrie bunt en misschien wel gruwelijks hard mot werken, bunt zo mager dat wanneer zie-j zich snel ummedrae-jt, de gulpe op de rugge hebt zitten.

As Vodd-nsen wil ie-j ietwat proper veur de draod komm-n dus schone spiekerbokse en passen hemd d`rop. Daor zie-j sommigen lopen waorvan ie-j `t vermoeden hebt dat wanneer ze de bokse èèn maote groter koopt ze-j ok gin oaverhemd meer an hoeft te trekk-n.

Op zaoterdag naor `t Waterlooplein, want daor is altied `n markt waorop van alles te koop is. Bie-j `t begin van de markt `n fietsenhandelaar waorbie-j ik de ogen de kost hebt gegeven um te zien of d`r veur mien nog bekende fietsen te koop bunt, maor helaas. Veur de rest van de markt is `t net of de president van Amerika hier was op zien reis deur Afrika. Allemaol bongo`s oftewel tamtam`s te koop. Ik denk dat d`r in donker Afrika gin stam meer spöllers hef die-j op zon tamtam kunt gewodd-n umdat alles hier op de markt ligt.

Dat is enen helft van de kraomkes, de andere helft besteet uut wierookstökskes en Cannabis. De hele markt roekt naor `n olderwetse, oaverdaodige bewieroking tijdens `n begrafenis. A-j soms nog dachten dat de Tulp onze nationale trots is dan he-j `t goed mis. Allemaol Cannabis, die-j verkocht wordt deur luu met tatoo`s oaver `t gehele lichaam. D`r zit gin uutsteksel an `t lichaam of d`r hangt wel `n stuk iezer an. De taal op de markt is de ZOEWARTE taal waorbie de Z wat langduriger mot wodd-n uutgesprokken.

Op de terugweg naor `t hotel ontkom ie-j niet an `n veurzichtige blik in de etalages van winkels met zelfopblaosbare (moslim) popp`n. Ook winkelruutjes met rooie gedienen en eenzelfde kleur lempk-n. Wanneer ie-j iets te lange kiekt dan `n korte blik, wenkt zo`n dearntjen o`w al raps naor binn-n. Maor Ganzenpen leent zich d`r niet veur um onder de vrocht hen te weid`n. Sommige etalages bunt gevuld met hulpmiddelen asof `t `n doodgewone gruuntezaak is. Denk no`w niet dat `t tegen de kerstdagen an gevuld ligt met grote en kleine kears`n, nee `t bunt meestieds van die electrische éénhandle melkboeren op batterie`jen. De dearns staot d`r bie`j met de cilinders lös onder de kappe.

De terrassen in Amsterdam bunt bie-jzunder mooi um van te genieten. Ie-j kiekt o`w as Voddensen de ogen uut, bie`j `t zien van zovölle verschillende nationaliteiten en al die verschillende culturen. Af en toe wo`j `n zwerver gewaar den nog uut de vuulnisemmer graa`jt en zien maoltied afmaakt en zo no`w en dan `n moderne fietstaxi die-j o`w veur 10 euro `n half uur deur Amsterdam trapt.

Kortum, Amsterdam is altied weer de muu-jte weard um te bezuuk-n en völle luu-j zult wensen dat `t in hun eigen woonplaats ok zo is, maor dat Gradus Ganzenpen daor anders oaver dech, dat is zeker en veur de rest `n toet`n vol groet`n en töt kiek op

de website van Harry Jansen