APPEL VEU DE KOP

Enige jaoren geleden, en dan praot ik weer oaver de veurige eeuw, was `t in `n buurte met blagen net as tegenswoordig gebruuk`lijk dat d`r oaver en weer ok blagen van anderen oaver de vloer kwamen. En zo ook an de Rustlandlane. D`r woonden daor van alles deur mekare, op alle gebied, zoas Katholieken, Nederlands Hervormden en ok nog iets fiener.

An`t ende van de Rustlandlane woonde Jan Dood en a`j al iets dichter op de spoorbane an kwamen liep ie`j langs verschillende boeren en andere ambachtslieden. An `t begin van de Rustlandlane bu`j bie`j de Beumeman.

Oarnd Jan Beumeman hef `n zönne en daor geet `t mien vandage um. Wat wil `t geval: Tijdens `t buskruudspöllen ( verstoppertje) mos d`r enen naor `t huusken. De zoon van Oarnd Jan Beumeman wil dat niet hebben en begint ietwat pradderig uut de hoek te komm`n. Nao wat hen en weer gedram, genöl en ge-ezel wordt den jongen kwaod en slöt Gradus ganzenpen zien zuster met de bessem op de kop en wel zo hard dat de stelle d`r van brekt.

Toen Gradus dat zag, werd he`j duuvels en gröast nog snel `n paar keer langs `n grote appel en bedenkt zich gin moment en haalt vervolgens uut en met al zien kracht die in um zit smet he`j de bewuste dader met een appel veur de kop. Klaaatttss heur Gradus en daor rear`n he`j hen. Een blauw oge en pien an de kop hef he`j d`r an oaver ehollen en van zien moeder kreeg Gradus met dat een en ander an de Pastoor zol worden deur gegeven.

No`w was Gradus Ganzenpen daor niet direct van onder de indruk want de Pastoor kwam met enige regelmaot met zien bromfietse deur de straote en bracht een geestrijk (35%) bezuuksken an zien parochianen, en dat wol he`j graag zo laoten.

Maor Gradus zien moeder wil, um de vrede in de buurte te bewaren, hebben dat he`j zien excuus maakt. Vanaf Gradus zien huus naor `t slachtoffer zien huus is richting kerkhof en Gradus vuul`n zich zo ongeveer asof he`j onderweg was naor zien eigen befrafenis. Met lood in de schoene is Gradus naor binnen gegaon en hef zien excuus gemaakt.

De knaap zelf was d`r gelukkig niet en zien moeder had d`r al iets meer begrip veur gekregen en hef Gradus getrakteerd op een snuupsken van de wekke (Gruyter). En met de snoete vol dröp liep Gradus de Rustlandlane weer af naor huus! En ok dat is waor gebeurd in de buurte van De Leuke.