Ku'j ow in 't kort effen veurstell'n?

Ik bun Arie Ribbers, geboren in Ruurlo, net noa de vredestied, en op e'greu'jd in mien geboorteplaats en op ’t Medler. Dat is ne buurtschap tussen Ruurlo en Vorden, woar mien va 'n holtzagerie'je en 'n holthandel had. Noa de middelbare schoale in Zutphen bu'k noar (tonn nog) de Rijkskweekschoale in Deutichem e'goane en doar op'eleid tot meister.
Al met al he'k nog 18 joar veur de klas gestoan in Deutichem, Barchem en Zutphen. In Deutichem en Barchem bu'k warkzaam e'west in 't lagere onderwies, in Zutphen in 't middelbaar beroepsonderwies.

Wie kennt ow allemoale van Omroep Gelderland, hoe bu'j doar zo bi'j e'kommen?

In 1967, dit joar dus 40 jaar eleane, begon Henk Krosenbrink oet Wenters met 't Gelders programma van de RONO, de Regionale Omroep Noord en Oost. Doarveur was he op zeuk noar leu met een goeien stem, dee zowal 't Nederlands als 't Achterhooks proaten kon. As old-meister kwam he ok op de Kweekschoale en zo is 't allemoale begonnen. Joaren he'k freelance e'warkt, tot vorig joar 15 joar in vaste dienst, en noe bun'k weer freelancer.
In geval van zeektes of andere umstandigheden nem ik programma’s van collega’s oaver en ik bemeue mi'j met de organisatie van 't splinternieuwe programma ‘De Ronde van Gelderland’, dat letzten zoaterdag veur 't eerst werd uute'zonden vanuut Tuil (bij Zaltbommel).

Bi'j omroep Gelderland he'j d'n Achterhook en 't Achterhooks ruum gepromoot, wat he'j met d'n Achterhook en 't Achterhooks?

Als Achterhooker he'k 'n specialen band met dit gedeelte van Gelderland. Ik holl van de leu die doar wonnt, de geneuglijkheden en de tradities, van d'n umgeving en neet te vergetten 't dialect.

Als ik dan andere regio's in Gelderland bekieke (loat ik 't bi'j disse provincie hollen) , dan bunt dee dinge hier zo e'regelt. A'j un good veurstel hebt, dan zegt 'n Achterhooker snel joa’. En ‘joa’ is ook ‘joa’. ik bedoele da'j van 'n Achterhooker op an könt.

Wat 't dialekt betreft, ik vin 't heel belangriek dat kinder de standaardtaal good leart proaten, ik vin echter dat wi'j 't dialekt neet motten vergetten. Doar zit zo veel moois in, dat 't jammer zoll wean um dat moar overboord te gooien.

Jammer genog is 't Achterhoeks Accent d'r neet meer en ik mene mi'j te herinneren dat ok ow zoaterdagse bi'jdrage afgelopen wekke veur 't letst was, Is dat no 't ende of goa'j gewoon weer vedan met wat anders bi'j omroep Gelderland?

Ende juni is Achterhoeks Accent, noa zes seizoenen, op'ehollen te bestoan. Dat is jammer, want ik vinne dat Achterhook en Liemers wel 'n eigen radioprogramma verdenen, moar zo goat dee dingen. In de loop der joaren he'k de neudige programma’s zeen kommen en goan. Panta rhei: alles is in beweging.
Zoas hier boaven al e'schreven is bemeuj ik mi'j no met ‘De Ronde van Gelderland’.

No he'k veurige wekke in de krante eleazen da'j 'n nieuwe oetdaging angoat, ku'j doar iets meer oaver vertell'n, wat goa'j doon en wat holt 't in?

De functie van streektaalconsulent holt in dat ik probere (met anderen vanzelfs) 't dialekt bi'j anderen in de belangstelling te hollen. Dat kan deur mooie projecten te bedenken en leu met road en doad bi'j stoan.
Heel völle leu wilt bv wal iets schrieven in 't dialect, moar wet neet precies ho ze dat an mot pakken. De streektaalconsulent kan doar bi'j helpen. 'Met d'n Streektaaltelefoon bijvoorbeeld. Elken dinsdag tussen 09.00 en 12.00 uur bun'k op 't Staringinstituut in Deutichem. De leu könt mi'j doar bereiken via het telefoonnummer: 0314-332831.

Projecten dee veurzichtig op stapel wort e'zet bunt: Streektaal onderweg, Tweetaligheid en Streektaal in het clubblad.

Wat 't eerste betreft: in samenwerking met bijvoorbeeld Syntus zoll ik geerne 'n gratis krantje in het dialect oetbrengen. Reizigers könt dat krantje pakken, zoas zee no de Spits! of de Metro metnemmen.

Bij Tweetaligheid mo'j denken an 'n project, woarbi'j dialectsprekkende olders eur kinder d'n streektaal bi'jbrengt. Noast 't Nederlands vanzelfs.

Streektaal in het clubblad wil bewerkstelligen dat minstens 1 pagina in een clubblad in 't dialekt word e'schreven. A'j doar un priesvrage an koppelt mot dat lukk'n!

He'j nog andere activiteiten, di'j noast de dialectconsulent doo?.

'T op de markt brengen van luusterbeuke in 't dialekt is een activiteit, moar ik bun ok samensteller van de "Spreukenkalender voor Achterhoek en Liemers, ik schrïeve zo no en dan nog veur Landleven en veur IVY, 't blad van de AMI-kappersketen, ik schrieve een tweewekelijkse column veur De Stentor en ik bunne nog met 'n mooi project bezig, woaroaver ik jammer genog niets kan/mag zeggen.
Om 't in mooi dialect uut te drukken: never a dull moment!

He'j nog meer toekomstplannen?

A'j de 60 gepasseerd bunt he'j meer verleden dan toekomst. Das neet anders. Ik hebbe niet zovölle plannen in mien heufd!" . Ik zee wal wat d'r op mien weg kump en of ik doar iets met kan of wille. 'T belangriekste is 'n betjen gezond blieven en van tied tot tied rust te nemmen. Noh, dat kump best in orde.
Ik do messchien wal van alles en völle leu vind dat völle, moar a'j de zaken hobbymatig kunt benaderen (en dat do'k) is d'r niets an de hand.

Woar könt de leu terechte veur voor informatie?

Ik bun het eenvoudigst te berieken via email :

veur algemene vroagen.

veur vroagen ovver mien radio en tv activiteiten en

veur vroagen ovver mien functie as dialectconsulent

Mien splinternieuwe mobiele nummer is op te vroagen bi'j het Marlineteam.

Wil i'j nog wat kwiet, wat ik vergetten ben um te vroagen?

Vanzelfs is d'r nog völle meer te vertell'n, moar ik denke da'j veurlopig voldoende op de hoogte bunt. groet'n, Arie Ribbers