Welkom in het

LEESZAAL - ARCHIEF

Hier vindt u verhalen van Wim Bluemers

Enige jaoren geleden, en dan praot ik wéér oaver de veurige eeuw, wodd`n d`r ok regelmaotig buut`n `t etten gebruukt en dat hierveur verschillende methodes waren mag o`w duudelijk weaz`n, maor wat Jan Teerstraot hef klaor gemaakt slöt jao alles.

Jan woont in `n optrekj`n an de Rotte Vruchtenstraot hier in `t darp en hef zich dat alleraardigst onderhollen. Umdat Jan zich in zien spaorzame vrie`je tied af en toe bezig holt met alternatieve tuinanleg, he`j vleit geregeld "heidepaerse" klinkers hef Jan dat ok bie`j zien Grada achter `t huus toegepast. Een aardig zitje met hier en daor `n plantje van Ad Kippenvel brengt al raps gezelligheid.

Jan hef `n gruune outfit en dat hef he`j neudig wanneer he`j op jacht geet. Op verantwoorde wieze wordt d`r wild afgeschotten. Niet met drie man `n knien in `t gaas jagen en vervolgens deur `n baron `t laatste schot geven, maor met respect veur de natuur en zien wildstand. Dat um dat af en toe `n stuksken vleis oplevert zal o`w duudelijk weazen en dat d`r af en toe luu bunt die`j daorvan met smikkelt mo`j van mien annemmen. Dus is bie`j Grada en Jan de zommertied geregeld benut um achter `t huus de barbeknooi an te zetten. Knientj`n an `t spit en dan maor genieten. Jan, met knoesten van handen as oavermaotige zaodbatsen, löt zich `t ding niet verpruttelen. Af en toe `n slok uut de beugelfles en zo no`w en dan met de arme `t zweet van `t veurheufd veagen löt de geur van `t vleis de buurte met genieten.

No`w schient `t zo te weaz`n dat Jan van de kinder `n electrische gril veur in de open haerd hef gekregen. Ziels gelukkig en zichtbaor blie`j was Jan met `t presentje en kon amper wachten op de tied dat de haerd weer is angestokken kon wodd`n. En verduld, de herfst begunt en de kolde aovenden dient zich an. Um zien probeerseltje te kunnen uutvoeren hef Jan `smargens al vast `n knien uut de diepvries gehaald want vanaovend hunk `t beest in de haerd, mot Jan gedacht hebben. Oaverdag af en toe denken an `t lekkere stuksken vleis dut `m de lippen aflekken.

Eenmaol in huus angekommen hef zien Grada al veurbereidingen getroffen. De taofel gedekt, `n halve liter op de hoek van de taofel en de deuze met zien presentje bie`j de haerd. Eerst de gril in mekare zetten en vervolgens de haerd anstekken. Trek zit d`r bie`j Jan wel in, dat kan Gradus bevestigen. Toen de piepe eenmaol warm was, wodd`n de gril in de haerd geplaatst en de stekker in `t stopcontact. Effen proberen en jao heur, pjie-iep, roar, pjieiep, roar, `n egaal ritme klinkt uut de haerd. De pinne van de gril wordt in de lengte deur `t knien gestokken en vervolgens op de gril geplaatst. En weer, pjie-iep, roar, pjie-iep, roar. Jan begunt vol trots in de haerd te kieken en zut met genoegen de glans op `t knien verschienen. Een slöksk`n uut de beugelfles op `t succes van zien grilleken. Grada, kiek ens hier hoe mooi `t ding draait. En ok Grada mot bevestigend glimlachen naor zien Janneman.

Plotseling steet de gril stil en Jan kik bezörgd in de haerd en zut dat `t knien no`w wel snel bruun wordt an ene kante. Deur de hitte van de haerd is `t plastic van de Gril gesmolten en drae`jt niet meer vanzelf. Gauw naor de schure en griepen de werkhandschoenen, ik heb oele zo straks verteld dat he`j nogal oavermaotse handen hef, met ene hand in de haerd um zien knien te redden. Gruwelijks zweiten en af en toe zien vrie`je hand gebruuken um de beugelfles te kriegen. Dat d`r den aovend meer flessen bunt genuttigd zal o`w duudelijk weazen. Veur Jan gold maor èèn ding en dat was zien knien redden. Nao lange tied met de handen zien knien in `t vuur te hebben gedraaid is `t beest gaar. Het knien an de pinne op taofel en dan as `n speer zien grilleken uut de haerd regelrecht naor de grieze container. Grada en Jan hebt toch nog aardig gesmikkeld in de veurkamer.

Of disse gebeurtenis no`w de reden is gewest dat Jan en Grada `t plafond in de kamer hebt motten sausen is niet bekend. En in hoeverre de kinder nog bedankt bunt veur `t geschenk is mien ok niet ter ore ekommen.

Zo zie`j maor weer, vertel niet altied alles in de vergadering want veur da`j `t wet steet `t op de snelweg. En as Gradus `t wet, kump `t wieter ok datgene wa`j misschien niet had willen wetten, maor dat Gradus Ganzenpen daor soms anders oaver dech, dat is zeker!