HOOG BEZEUK OP 'T HUUS TE REURLE

Ene van de vertrekken in ons Reurlse gemeentehuus, wodt den Corsicaansen kamer eneumd. Ho of e an dee name kömp, wi'k ow geerne vertellen,en mochte ik légen, dan leeg ik in commis¬sie. In 't joor 1686 wodden der in Metz 'n jungsken geboren in 't gezin van ne Westfaalsen edelman. Theodoor Baron von Neuhoff wodden e edeupt. Aover zien jeugd is zo good as niks bekend.
Zoas 't in dee dage völle bie den adel veurkwamp verhuurn hee zik, too as e der de laeftied veur had, as solda¬ote. 't Europa van dee tied was zo onrösteg as ne biejenzwarm, dus wark zat. Hee deenn in 't leger van Zweden en Frankriek, en nog later ver¬trok e naor Spanje.

Op 'n kwaojen dag wodden onzen Theodoor slacht¬offer van 'n groten zwendel. Totaal zonder inkommen en met 'n zowat läögen geldbuul kwamp e an 't zwar¬ven. 't Had der bizunder lillek veur 'm uut-ezene as e gin anbod van Keizer Karel den zesden had e-kregen, um resident veur 'm te wodden in Floren¬ce. Door had Theodoor de oorne wal naor han¬gen, dus reizen hee af e naor Italië. Zien köpken was good veur mekare, en 't kosten 'm gin meuite um der good in-ebörgerd te raken. In 't mooie land kwamp e al gauw in anraking met leu uut Corsica, dee egaals aoverhoop laen met 't volk uut Genua dee dat mooie eiland bezet heeln. De Corsica¬nen wollen geerne weer baas in eigen huus waen. Zee hadden zik laoten inlichten aover Theo¬door zien ervaring as kriegs¬heer, en baoden 'm 't Koning¬schap aover Corsica an, as 't 'm lukken eur eiland in hande te kriegen.

Door zag dén wal brood in, maor hee was wal zo goo¬chem dat e eerst andern op zien hand pro¬beern te krie¬gen, dus reizen e af naor Constanti¬nopel um te zene of den Bey van Tunis der oorne naor had. 't Leep zoas e hoppen, en in korten tied had e ne schip, waopens, en mondveurraod. Al vlot had e 'n heel leger bie mekare, en kon 't schaopenscheern angaon. Met den helen bups trok e op Corsica an, en in 'n poep en 'n scheet wodden in 't joor 1736 de bezetting uut Genua deur 'm van 't eiland af-eschupt.

De Corsicanen heeln woord, en Theodoor Baron von Neuhoff dén wodden ekroond as Theodoor den Eersten, koning van Corsica. Arg völle plezeer hef e der neet van ehad, want 't zelde joor mos e al weer flink an de bak um geld bie mekare te kriegen veur den strijd. De leu van Genua leten 't der niet bie zitten en slagmaols slogen zee der op, um Theodoor met zien club vot te kriegen.
't Wodden zo slim, en 't geldgebrek van Theodoor leep zo op, dat e op bedelreize mos. Doorbie kwamp e ok in Holland trech¬te, en door had e better vot können blieven!

Amper had e in Amsterdam de loopplanke verlaoten too hee in de krage egreppen wodden, en in 't cachot esmetten umdat e nog olde spölschulden had...
Theodoor zol Theodoor neet waen ewes as e zik hier neet uut ered had.'t Was ne gladdekker, en vanuut de gevangenis lukken 't 'm nog um geld bie mekare te schooiern veur zien bedreigde konin¬kriek.

Nao 'n tiedjen wodden e vrie-elaoten, en trok e van landhuus naor landhuus um bie de adeleke families an te klop¬pen veur 'n biedrage. Zo wodden ok den Achterhook deur 'm an edaon. 't Zelle bie Hengel, 't Onstein in Vodden, 't Velde bie Warnsvel¬d, en ok 't Huus te Reurle wodden neet vergetten.
Al dat geschooierte had 'm niks eholpen, in den tied dat hee op zienen bedeltocht onderweg was, hadden de Fransozen bezit enommen van Corsica, zee wazzen bange dat Genua 't weer in hande zol kriegen, en dan van dooruut Frankriek kon bedrei¬gen. Metene dat Theodoor voot an land zetten, kon e weer de kuier¬latten nemmen.

Nog enen maol lukken 't 'm, met hulpe van twee Engelse oorlogsbaodems, an land te kommen. Maor zien bezeuk wodden ok disse kere neet op pries esteld, hee wodden der met 'n hoera'tjen vanaf eschupt. Corsica mos e definitief afstaon an Frankriek, en hee raken totaal an de grond. Hee zoog maor enen uutweg, aoverniejs trok e naor Holland en probeern e hulpe te kriegen.
Op dee tweede reize kwamp e ok weer bie 't Huus te Reurle trechte, woor e gastvrie wodden op-enommen. Totdat e, volgens bepaolde bron¬nen, door 'n huusknech doodsloog en de bene mos nemmen.

Nog was zienen elénd neet veurbie, want too hee in 1749 nog is ne maol Engeland an dee, kon e dóór gaon brommen umdat e ne hele bulte schuld nooit af-elöst had. Zeuven joor hef dén mattelgank veur 'm eduurd. 'n Minister dén spiet met den ongelukkegen keerl kreeg, maken zik stark veur 'm en kreeg zovölle geld biemekare dat Theodoor weer vrie man was.
Völle hef e der neet meer an-ehad want in 't zelde joor, 1756, is den Corsicaansen koning in ballingschap estorven.
Ik hoppe da'j noe wet hoo as 't Huus te Reurle an zienen Corsi¬caansen kamer is ekommen.

W.J.Bluemers 22-02-1997 bronnen: Prisma wegwijzer Gelderland. Dagblad Tubantia,22 september 1951

Dit verhaal is geschreven door Wim Bluemers, wilt u meer lezen over Wim, kijk dan op zijn interview..