Welkom in het

LEESZAAL - ARCHIEF

Hier vindt u een verhaal van Eddy Geurtsen

DE BOERENTOMBOLA

Derk Vanagterdegäöte geboorn zo rond de twintiger jaoren van de veurge eeuw, was een boer uut de Veldhook onder Harfsen. Jan was etrouwd met de dochter van de hereboer Stuggink uut Alm’n. Derk had 11 beste beeste en een mooi schot vol verkens en volle landbouwgrond, deed an tarwe en aerjappel teelt, had een trekker dee de Canadeezen achter elaoten hadden toon de oorlog veurbie was .Wa’k der nog van herrinner van dee trekker was dat iezeren zadel met dee zweitgaatn der in veur de bestuurder. Derk had ok een biename Derk Vantknienevelleke , maor daor gaot vershillende verhaaln aover ,maor um gin verkeerde feitn de welt in te help’n wil ik hier neet wieter op in gaon, alleenig wa’k wal kwiet wille was, datte geerne een striksken zetten.

Maor waorum ik dit verhaal schrieve is ut volgende , op een mooien Dinsdag in 1953 veel der bie Derk Vanagterdegäöte een breef op de deurmatte, verstuurd vanuut Vodden , een uutneudiging van de Boerenbond veur ut Boerenbondfeest op 20 Mei rond Kasteel Hackfort onder Vodden.

De trekker was net nao ekekken de heujkaore was op een paar olde knienehökke nao láög, ut land was umme de hegge was eknipt en’t arf lag der kantig bie. Dus Derk Vanagterdegäöte kon geröst gaon veur een dagje Boerenbondsfeest bie Hackfort. Baovendeen had Derk eheurd van streuper Hannes dat der mooie prieze waarn te winnen met de boerentombola.

De trekker met Derk achter ut stuur op ut zweitzadel en Drika de boerinne met heur mand en breiwark ,zittend op een baale stroo waor zee een grootn roojen zakdook aover hen drappeerd had ,um heur donkerbroene mantelpekske te bescharmen.

Bie Hackfort an ekommen stondnen de echte Achterhookse boern hun al met een flinke rooie neuze op te wachten, waorschienlek van dee kolde wind dee daor aover de weidens blös.

De veurzitter van de Boerenbond Gait de Dopneuze , jao zoo neumt ze um umdatte zo’n kniesterd van een neuze hef. Verklaort de boerenspelen veur e’opend.
D’r was vanalles georganiseerd, zo as koostront gooien, snelmelken, keunesmieten, eiervangen en knuppels in’t hoonderhok smieten.

Vandergäöte had allenig maor intresse veur ut keunesmieten en knuppels in’t hoonderhok smieten. Maor waor Derk ei’glek veur kwam was de boerentombola daor waarn altied groote prieze mee te winnen. Zo’as een gratis maejbeurte veur een bunder Tarwe of Gaste, een kartonnen deuze met vief onriepe hanen, een jaorabonnement op de bestriedig van de Coloradokever, een transistortje zo’n nieuwerwetse uutvinding veur die tied.

Vanagterdegäöte had gin intresse in aldee prieze , hee was hillemaol uut de Veldhook ekommen veur de heufdpries . Ut halve Verken An’t ende vande dag wodden de punten eteld en wodden de prieze verdeeld. Toon ut gejuuch opsteeg veur de prestaties van Derk bie ut keunesmieten ,was Derk al ingedachten ut halve Verken naor de heujwaagn ant sleppen .Ut grote moment kwam naoder bie. Met nummertje 6 op ut klamme pepierke in zien zweitende knuuste ,wachte Derk op de letste ronde , de heufdpries. “En…..de heufdpries gaet naor…….nummer……6. Derk Vanagterdegäöte gleufde zien verweerde oorne neet. Hee had ut halve Verken ewonnen. Zelfs bie Drika de boerinne kon der endlek een zuunig lechje vanaf. Ut Verken werd op de heujwaagn elaadn, en daor ging ut hen, weer trugge naor de Veldhook .Bie de eerste de beste Harbarg koch Derk zich een flesse met ut allerzuuverste garstewater .

Ut Verken most wel nat emaakt wodden en zo nam Derk zich geregeld een slok uut de flesse.
In de wiete zag hee de Toorn van Alm’n en wisse datte al aadig aover de helfte was, maor de flesse ok. Endlek dan, daor wasse thuus , Derk ondertussen mooi dikke , äöst zich ut Verken van de waagn ,slept zich der met aover de daele en zet ut halve Verken bie de andre Verkens in’t schot. Mooi dat hadde netjes edaon vonne zelf. Derk kump de kökken inzetten en maakt ut letste uut de flesse soldaot . Hee gaet nog maor es trugge naor ut schot um te kieken hoo zien Verken der bie staet , hee kik met glaezige oogn aover de zomp ut schot in en zut zien Verken languut liggen, hee zet um weer rechtop ,maor hef um de konte nog neet to ekeerd of ut gaet der weer bie liggen.

Hee dut dat nomaols maor ut heelp niks ,zie boerentombola Verken gaet der gwoon bie liggen. Hee wodden zo mieters in de hoed , hee grep zich ut Verken onder de Arm löp der met naor buutn smit ut op de heujwaagn en rid der met trugge naor Vodden ,naor Frè van de Veldhutte dee had de prieze regeld veur de boerentombola .Hee rid ut arf bie Fre op ,dee um altegemeute kwam , zo Derk Vanagterdegäöte wat slinger ie, toch te volle feestevierd. D’r volt niks te viern lalt Derk, t’is Schandalig breng ow ut Verken trugge .

Waorumme dan Derk . Ik wol ut bie de Andre Verkens in’t schot zetten maor hee donderd steeds umme. Ha’j um motten stutten met de flesse Derk; zegt Frè ,löp naor binnen en trök de deure achter zich too , Derk Vanagterdegäöte achterlaotend met ut halve Verken.