Deze pagina is vernieuwd op 25 oktober 2007
Een brug(getje) te ver
Enige jaoren geleden, en dan praot ik weer oaver de veurige eeuw, bunt d`r vanuut de vergadering twee leden die onafhankelijk van elkaar veur de binnenweg hebt gekozen. Wat wil `t geval? Hendrik Klimplant hef uut veurzorg gekozen veur de fietse. Nao een enerverende vergadering en de daorbi`j samengaonde versnaperingen grip Hendrik Klimplant de fietse en trapt `t ding fatsoenlijk op de pedalen um zogezegd oaverend te bliev`n en gang te hollen. Umdat de ogen nao de vergadering niet meer datgene bunt wat ze`j veur de tied wazz`n kump Hendrik al fietsende op `t bruggetje an bi`j de Pastorieweg. Gauw kiez`n hef Hendrik gedacht, za`k de leuning links of za`k de leuning rechts pakk`n? Nao dat Hendrik de keuze hef gemaakt en de daad bi`j `t woord voegt, volgt d`r een plons, een vluuk en een natte kearl die schuchter um zich hen kik of d`r nog iemand iets gezien hef. Da`s één, no`w de tweede! Een grote vrachtwagen drea`jt deur de straote en parkeert niet al te wiet van de Kleine Kerk. De chauffeur, Gradus, `n vriendelijke westerling, nemt plaats an de tap en laot zich menig consumtie genuug`lijk smaken. Toe `t dan toch tied wodd`n um op huus an te gaon vrög Gradus an Jan met de stofjas: Hoe kan ik nu het beste naar huis rijden? Jan dut um uutlegg`n ho`w he`j mot rieden en vervolgens ronkt de zwaore motor van de vrachtwagen en geet Gradus huuswaards. Rechts af hef Jan gezegd, maor natuurlijk niet via de Pastorieweg. En daor steet Gradus met zien grote truck veur `t kleine fietsbruggetje an de Pastorieweg. Op angeven van luu uut de buurte kump de veldwachter en snapt `t probleem, he`j stelt veur de wagen te laoten staon en met de veldwachter samen op huus an te gaon. In huus wordt Mientje niet wakker gemaakt met `t parkeerprobleem van Gradus. Maor toen Mientje d`n andere margen naor buut`n ging en zut de grote wagen an de andere kante van `t kleine fietsbruggetje staon wist ze wel wat de botter kosten. En ok dat is waor gebeurd in de buurte van De Leuke.
