Deze pagina is vernieuwd op 25 oktober 2007
BUURTE MAKEN! Enige jaoren geleden, en dan praot ik weer oaver de veurige eeuw, hebb`n wie`j hier in de Leuke te maken met een striekert! No`w vraogt iele o`w af wat veur een soort strieker hier bedoeld wordt, welno`w ik bedoel een schilder, `n verver of hoe `t ok genuumd mag wodd`n. Hannes van Stoppenjan teunt zien goe`je wille en wil tegen een gereduceerd tarief ons onderkomm`n van een kleurtje veurzien. Vakmanschap is Meesterschap dat steet in zien vaandel en dat gif `t resultaat ok weer. No`w dut zich `t feit veur dat ik op een of andere wieze iets te wetten bun gekomm`n oaver Hannes van Stoppenjan wat direct te maken hef met Vakmanschap is Meesterschap maor helemaol niks met de verf of blokwitter. wat dut zich veur?? Hannes van Stoppenjan hef op één of ander moment te maken met `t andere Vakmanschap en dut deze tak ok ruumschoots eer an. Naodat de gleaskes dröge bunt kommen te staon geet Hannes met de auto huuswaerts. Een oplettende veldwachter zut Hannes en höld um staonde. Nao wat hen en weer gepraot wil de veldwachter graag zien rie`jbewies bie`j de verzameling en mot Hannes veur een kortere periode met de fietse. Dat Hannes van Stoppenjan `t fietsen niet tot hobby hef verkoazen löt zich anzien. Op `n mooie dag in de veurige eeuw fietst Hannes van Stoppenjan deur `t darp met nogal wat lawaai in de hoed. Dat een manier van leaven maken hier in `t darp niet onopgemerkt blif bliekt uut `t volgende veurval, en dan komm`n wie`j al dicht bie`j de titel van dit verhaal. Hannes wordt samen met zien compaan drinker angehollen deur de dienstdoende veldwachter. Deurdat ze nogal makkelijk van de tonge wazz`n neudigt de veldwachter hun uut um op `t bureau verder te bivakeren. Hannes van Stoppenjan wordt kwaod en grip zien fietse en smakt de olde Empo met `n ferme zwaai op de politiebus. Hier, zo reerd`n Hannes, hier he`j mien fietse ok, mien rie`jbewies he`j ok al in beslag genomm`n. Op `t bureau geet `t van dik holt zagen wie`j planken en van dun holt vliegerlatjes, totdat Hannes van Stoppenjan, `t al wat al te lange vindt gaon duren en de politiebeambte vrög: Toe bel effen naor mien Anneken en zeg da`k hier an de Raodhuusstraote bun um buurte te maken. En ok dat is waor gebeurd in de buurte van De Leuke.
