Welkom in het

LEESZAAL - ARCHIEF

Hier vindt u BELEVENISSEN VAN KEES VERBEEK

De vertaling vindt u door te klikken op deze link .

MIEN NIEJE AUTO EN DE ELAND

Wie, met z'n drieën, waren van een fijnen vakantiereise deur Nederland, Belgie en Frankriek weer gelukkig thuus ekommen.. De reis was vreed interessant en de nieje auto liep goed. Wie waren dus met z'n drieën nao enkele wekke weer op den Finsen baodem terugekeerd. Aover de Oostzee en daornao op de Finse Golf genotten wie ok van de zeereis op den groten passagierboot. Mien nieje auto stond op het benedendek in den groten boot en wie hadden een fijne hut met patriespoort, zodat wie aoverdag aover het water konnen kieken, as wie in den hut wazzen.

De vakantie zat t'r op en mien wark en de verantwoording veur mien gezinsvervangende tehuus veur keals, was weer anebrokken. Het was in het jaor 1990, net toen ze hier Middenzommer vierden. Ik reeje 's aovends nog effen van huus af naor dat tehuus. Ons eigen huus was op een barg in het bos ebouwd. Maor de plicht dwong mien effen vot te gaon...
Het was in den aovend, helemaol lich nog buten, zoas het hier altied lich is op Middenzommer. De meesten die dit least wet misschien, dat hier in het noorden de zunne gaar niet ondergeet den tied van het jaor. Ik bedoele dan in Lapland en de rest van het noorden.

Ik had schik van het mooie zommerse weer en verkeer was t'r gaar niet op de weg. Files he'w hier eigelik now ok nog niet! Eerst jagen ik aover een snelweg en daornao op een afrit naor un gewonen weg en hield de snelheid die'j riejen mag gewoon an. En inens zag ik iets groots veur de auto lopen, toen heurden ik een knal, gerinkel van een kapotte veurroete en daornao het sissende geluud van het water dat uut het koelsysteem aover de heite motor liep. Nao enkele seconden stond de auto stille en ik zag toen een groot beest wegspringen, dat in de berm in mekaar zakten en dat nao stuuptrekken met de peute stil bleef liggen...

Daornao zat ik een paar seconden, misschien minuten, eschrokken in mien wagen en vuulden glassplinters tussen al mien vingers. Maor gelukkig had ik het ok dissen keer keer leavend afebrach. Erger was het met den eland en mien nieje auto.

Wat mos ik now doen? Het beste was om drek de finse pelisie op te bellen. Die kwammen ok nao een paar minuten en niet lange daornao een auto met aanhangwagen, die dat doje dier metnam, dat de pelisie nog effen een genadeschot egeven had.
Mien auto, die ik zo mooi vonne, werd voteslept met een sleepwagen en daor ston ik. Gelukkig leavande..

Dat was de negende keer, dat ikke weer leavend uut een tamelijk ernstig ongeluk was ekommen. Weer had een Hogere Macht de handen beschermend aover mien ehollen. Ik durven nauwelijk te denken, hoe het was afelopen, as ik dit ongeluk op de snelweg had metemaakt.

Mien nieje auto was now "een kneus" ewodden, den groten eland dood, maor ik deed mien ritjen naor mien Zorgtehuus effen later met een taxi en lied mien ok naor huus brengen den mooien zommersen aovend in het rustige Finland.

Geschreven door Kees van de Meister, in Finland, November 2007..