Heite flatsen!

Enige jaoren geleden, en dan praot ik wéér oaver de veurige eeuw, was `t met `t boerenleaven heel anders gesteld dan tegenswoordig. Vandaag de dag bunt d`r loopstallen met carrousel melkinrichtingen waorbie`j de Clara`s 4 en Betsie`s 7 precies optied an de melkmachine zit en d`r nauwelijks `n olderwetse melkesboer an te passe kump.

Nee, dan de tied waoroaver dit vertelseltje geet, dat was pas olderwets genieten van `t boeren leaven. De beesten waren meestal op papier gezet middels een tekening en de namen wodd`n d`r al raps an vast gekoppeld. Zo wist de boerenluu precies of ze `t met Betsie 7 dan wel Clara 4 te doen hadd`n.

Zo ook in `t buut`ngebied van ons Vodd`n. Hendrik en zien Leentj`n hadd`n `n aardige veestapel veur die tied en ze`j konnen zichzelf en de blagen aardig redd`n. Een eigenwies beest, zat d`r altied wel `s `n keer tussen en was in völle gevallen gin uutzondering.

En laot `t no`w nét oaver zo`n ondeugend beest gaon. De koe, `n echte kwao`jen Herford wodd`n altied apart in de wei`je geholl`n um te veurkomm`n dat he`j met zien gereppel onneudig de beesten van`t rit bracht. Altied en eeuwig de vrogt kapot en dat `t `n ondeugend vel van een beest was, wisten Hendrik en Leentje maor altegoed. Altied veurzichtig de weide in en de Herford niet uut `t oog verliez`n. Al menig keer was de afweaging gemaakt um de Herford maor op de markt te zett`n, maor och he`j gaf toch nog behoorlijk völle melk.

Op `n mooie dag, hef Hendrik `t beest in de kleine weide achter de bongerd gedaon en dat stond `t beest niet echt an, maor goed Hendrik is de baas dus anhollen.

Nao `n dag van noeste arbeid was `t `s aovonds bie`jtieds de beddestee in. Een gemiddelde beddestee waor Hendrik en zien Leentje wonderwel konn`n gewodd`n. Hendrik sleep altied an de buut`nkante en Neeltje d`rachter. Ze`j le`jen dan, zoas dat heet in `n trein of in de leppel-leppel holding.

Midd`n in de nacht porren Leentje Hendrik iets tussen de ribben, want anders wodd`n Hendrik niet zomaor wakker, Hendrik, wordt `s wakker, d`r is iets gaonde in de kleine weie tegen de bongerd. Hendrik wrif zich iets in de ogen en spitst de oren. Verduld jao, Hendrik heurt ok wat. D`n ondeugende Herford is an `n donderen in de weide.

Hendrik löt zich uut de bedstede zakk`n en stapt in de klompen. Stel o`w veur dat d`r dan `n kear`l steet met `n faal wit hemd met kneupe en lange mouwen, en dat diep in `n lange onderbokse gedouwd. Zo`n lange onderbokse wodd`n in die tied ook wel pegel genuumd. Model zat d`r niet an. De piep`n waren altied te kort en mossen in de sökke wodd`n geholl`n anders krop o`w dat ding omhoog. Het kruus van de bokse hing zowat tussen de knieën en de gulpe zat d`r meestal midd`nveur zodat "Getman"altied de neiging had um effekes in de andere wei`je te kieken.

Maor goed wieter met Hendrik. Deur de kökken naor de deale, griepend naor `n knuppeltje en vervolgens via de nindeure naor achter de bongerd. De koe had `t weidehekke missuumd. Hendrik liep `t beest `n endj`n nao in de weide en slöt `m een paar keer stevig op de konte. In ens drae`jt `t beest zich umme en begint op Hendrik an te lopen. Den blik in de ogen was Hendrik niet vremd en as `n speer de weide uut.

Op klompen de honderd meter binnen tien seconden lopen geet niet dus Hendrik vuul`n de heite aodem van `t beest in de nekke. Hendrik struukeld oaver `n polle gres en glee`j op de boek onder de vrogt deur. Gelukkig, hijgen Hendrik, en wrif zich fientjes in de hande.

Raps naor de beddestee want de tied vlög, zei de boer en smet de klokke deur de kökken. Veur de beddestee de klompen uut en glieren weer heerlijk onder de deakens.

Nog trillend van de inspanning probeert Hendrik de slaop weer te kriegen. Leentje wordt wakker en snuf onder de deakens, snufff, snufff, foi Hendrik wat stink ie`j, is o`w `n aerdappel uut de panne evallen of he`j in de bokse edretten.

Leentje vuult onder de deakens langs de zied van Hendrik en al raps was `t duudelijk. Hendrik was deur `n heite flatse egleden en deurumme zo gemakkelijk onder de vrogt hen geschott`n.

Gelukkig wazz`n de luu in die tied niet zo kieskeurig as vandaag de dag dus pegel uut en `t hemd zo diep meugelijk d`rin. Of Hendrik en Leentje die nacht nog wat anders gedreumd hebt is mien niet duudelijk maor dat `n heite flatse zien leaven gered hef is um al zien leaven bie`j gebleven.

D`r wordt tegenwoordig nauwelijks meer uutgegleden oaver `n flatse umdat alles onder de reusters kump te liggen en dat hölt de weidens schoon, maor dat Ganzenpen daor anders oaver dech dat is zeker en veur de rest `n toet`n vol groet`n.

de website van Harry Jansen