Welkom in het

INTERVIEW - ARCHIEF

Hier vindt u gasten die ik al geinterviewd heb. Voor meer gasten kunt u kijken in het archief

Gait de Strieker ofwel Gerbert Abbink, hij is vanaf deze week regelmatig te zien in de Leeszaal.

Voor de Nederlandstalige versie klik: hier.

Kun i-j ow zelf efkes veurstellen?

Mien name is Gerbert Abbink, bun in 1940 geboren en heb Zelhem nooit verlaoten. Bun vieftig jaor bezig ewest in ’t schildersvak as derde generatie van schildersbedrief Abbink. Bun ok actief ewest in ’t onderwies en bedriefsleaven en heb in 1974 ’t familiebedrief aover enommen. In 2005 estopt met de zaak umdat der gin opvolging was.

Wat heb i-j met d'n Achterhoek? .

Mien binding met de Achterhoek is de gemeudelukheid, ’t landschap en de rust. De meeste familie woont in de buurte en mien vrouw kumpt uut Halle,dus alles gezellig bi-j mekare.

I-j schrieft verhalen in ut Achterhoeks, hoe bun i-j doar to e'kommen?

Ik vertelle graag en völle in mien dagelukse taal,’t dialect .
In ’t verleden was ik o.a tonnepraoter bi-j de carnavalsvereniging en schreef toen al stukskes in de voetbalkrante en later ok in de plaatselukke krante.
Nao mien pensionering bun ik wat langere verhalen gaon schrieven. In ’t dialect is ‘t meugeluk um zaken an te kaarten die in ’t ABN te hard an komt.

Wat schrief i-j zoal?

Aover ’t algemeen schrief ik aover zaken die mien direct raakt ,milieu, vandalisme en onrecht. Wieter schrief ik in de voetbalkrante aover vrogger en belicht de familie’s die lange bi-j ’n vereniging bunt betrokken. Um ’n breder leazerspubliek te bereiken schrief ik dat in ’t Nederlands.
Voorlopig schrief ik verhalen uut mien eigen ervaringen. Maor zal ok verhalen verzinnen (b.v. sprookjes) as de bron is op-edreugt.

Treed i-j ok op in ut openbaar?

Sinds 2006 heb ik mien verhalen veur-eleazen op de achterhoekse aovond in ‘t Muzeum Smedekinck te Zelhem.

He-j ok al wat in boekvorm ezet?

Tot now toe is er niks in boekvorm ezet, al wel met andere schrievers der aover ehad um de verhalen te bundelen, maor door is nog niks van ekommen.

Waorumme he-j ekozen veur ut Achterhoeks Dialect?

De taal die wi-j dageluks sprekt is de beste maniere um ow gevuulens tot uutdrukking te brengen. Ik doe dat volgens de WALD spelling. Mien eerste verhaal heb ik bi-j ’t Staring Instituut in Durkum laoten corriceren.

Wi-j komt van oorsprong uut Eibergen, maor daor is weinig over bekent. Dus as ter luu bunt die daor aover meer wet dan gaarne via disse site kontakt opnemmen.

Waorumme he-j ekozen veur de Name Gait de Strieker?

Onder de name Gait de Strieker schrief ik mien verhalen.
Gait kump van Gerrit en de strieker hef te maken met mien vak as schilder .