Welkom in het

LEESZAAL - ARCHIEF

Hier vindt u een verhaal van Eddy Geurtsen

GANGSTERS

(Vri’j vertaald in’t plat van de Collum uut de Stentor van 8 maert 2008 van Buurman

Neeg’nhonderd dreeënzeuv’ntig in zes daage !..Plinggg!! neeg’nhonderdveer’nzeuv’ntig aoverigens, noe ik dit schrieve.

Ene Alana Tuttle dut mie ’n neet te negeer’n anbod van blauwe pillekes, want zee hef op èèn of andre meneere te heur’n ne kreeg’n da’k ’n probleem hebbe in’t gebied onder de navel en dat mien Mina daor heel ongelukkig van word.

Plinggg!! Daor kump neeg’nhonderdviev’nzeuv’ntig binn’n zeil’n. Hoo wet Reggi Silcox dat mien apperatuur van minder als gemiddelde maote is? Ik ken um gin ens. Hee zegt da’k daor met twee pillekes per dag minstens 3 Inch an too kan voeg’n da’s toch bienao 8cm . Zol mien Mina um ’n mail hebb’n too e’stuurd met ’n klacht? En dat nao veertig jaor?

Plingggg!! Neeg’nhonderdzess’nzeuv’ntig is ok binn’n.Rolexx’n met 75 procent kortting. Heb mie de rekk’n mechine der maor es bie e’pakt. Per dag krieg ik de letste wekke gemiddeld 164,83 mails waor ik neet umme vraogd hebbe. Da’s per uur 6,86 stuks. Op een totaal van 175 is dat dus 95 procent Spam wa’k op de kompjoeter binn’n kriege.

En now zu’j tuurlek zegg’n ’n filter der op, dat helpt maor effen, met ’n paar truuks umzeid ze dat weer. Ut bunt de Hufters van disse tied, dee zich daagleks bezig hold met ut bombadeern van reklame op’t internet van Viagra, damestasjes, casino’s, Lening’n, Nephorloges en verlengers van mien trouw gereedschap.

Plinggg!! Neeg’nhonderdzeuv’nzeuv’ntig .Van helligheid he’k de argst’n al’s t’rugge maild da’k hun läöge achterlijke stompzinnige zultköppe hillemaol tot balk’nbrie zol ramm’n as’k ze ooit teeg’n komme en met ut kanon van Grolle op hun vette Amerikaanse hamburgerpens’n zol scheet’n. As ze ok maor ’n gram harses hadd’n zoll’n ze wett’n dat gin mense eets köch van dee hufters dee eerst ow blood maond’n lang onder de naegels van dan haalt.

Plinggggg!! Neeg’nhonderdacht’nzeuv’ntig . E`ne met de name Clitis Mangilles dee vind ok al da’k der wal wat lengte bie kan gebruuk’n. Volg’ns mie wod ut deur verteld. Stel oe veur, elke dag staet de slager veur de deure te raern , datte veurdelige rundergehakt hef. Elke tien menuut’n belte an en ramt op de deure en klopt op de roet’n.
De plietsie zegt, neet reageer’n dan gaette van zelf vot. Maor dee slager stampt ut gehakt deur ow breev’nbusse. Wat doo’j dan ! juust .Ie pakt ow honkbal knuppel en ramt dee slager net zo lange deur de straote ,dat der gehakt van aover blif.

Ut is onbegriepelek dat Internet providers geen ….Plinggggg!! neeg’nhonderdneeg’nzeuv’ntig…….fatsoenlijk middel hebt teeg’n disse terreur of zee wilt ut neet ,kan ok nog. Dee pröttel kump zeld’n op mien eig’n naam binn’n .Inens heit ik Bossink vervolg’ns H.Burgens, hoo kan zoeets noe bie mie binn’n komm’n.

Wee wil der een spelleke ontwarp’n um ow af te könn’n tereageer’n op dee fictive verzenders .Eets met een auto racen deur de straote en dan zovölle meuglek plat ried’n en dan bonus punten a’j um in de achteruut nog ’n keer tot moos könt ried’n.

Plingggg!!! …neeg’nhonderdtachtig … Dolly String!! ..ondergood veur vrowleu . Dolly mot echt op de brandstapel .