I'J MAAKT WAT MET HIER IN GREFFELKÄMP

's Aovens gong 't d'r op, d'r was weer 's ne broetlachte bi'j Gert Luikink hier an de oaverkante in de Tabaksdeuze an de gange. Um een uur of halluf ene, heel 't dansorkest op met spöllen en wier 't gemeudelijk an wat röstiger in de buurte.

Wi'j konnen op bedde an. Zeutjesan kwam d'r 'n ende an 't gereer. Ne enkele autodeure sloog nog too, moar wieters.... röste.

Miene vrouwe en ikke leijen good en wal onder de plodden too'k inens recht op ‘t ende in bedde zat. D'r wier op de deure e'bokst, an e'beld en e'reerd, as of d'r een ruun d'n hals af e' doane wier. Doar ston d'r ene te reren: "Kö'j mien effen helpen drukken, hee dut 't neet" Ik schrikke mien 'n ongeluk en doo 't sloapkamerraam los um te zeen wee of doar met de zatte kop veur de deure ston.

Ik rope noar boeten: "Goat hen gek, ik kenne ow neet en ow helpen drukken um twee uur 's nachts... de groeten". Trugge in bedde zeg Sjouke, miene vrouwe, "Stel ow toch bloos neet zo an, i'j könt den kearl toch best effen helpen, heb i'j eiges nooit met panne an de kante e'stoane, goat now moar".

Zo raps loa'k mi'j wisse neet oet 't veld sloan en sputtere tegen: "Den kearl is zo dikke as 'n driethoes, den mag gaar neet ri'jen". Woarop zee zei: "Bennad, i'j hebt d'r ok wal 's ene te völle op, goat now, dan kö’w goan sloapen". Doar zat wat in. Nog gin menute later ston'k in de onderbokse met de stevels an boeten. Tuurlijk gin mense te zene en veuran de weg ok niemes. Umdat 't knap duuster is lope ik in mien ondergood d'n inrit af. Niks te zene, dus ik rope: "Kearl, ik komme ow helpen drukken, woar zit i'j bloos". Heur ik inens vanoet d'n hof achter mi'j met dubbele tonge:

"Hier bun ik, bi'j d'n viever......op d'n schommel,........ druk dan". Bernard Bonenkamp, 2006.

Bernard Bonenkamp, ne’n Grolsen oet Diem.

Wilt u meer lezen over Bernard Bonenkamp, kijk dan bij het interview dat Bernard met ons gehad heeft.