Deze pagina is vernieuwd op 8 maart 2007 Op deze site zetten wij iedere week een rommelmarktorganisator of een organisator van een evenement of tentoonstelling in het zonnetje, dit doen we dmv. een interview. Deze week is onze gast: Harry Jansen, hij heeft een eigen website geheel geschreven in het Achterhoeks Dialect en hij vertelt op onze site iedere maand een mooi verhaal in het dialect. Omdat Harry een voorstander is voor het behoud van het dialect hebben we ervoor gekozen om ons interview ook in het dialect te houden. Voor mensen die ons Achterhoeks niet machtig zijn hebben we een aparte link gemaakt met de nederlandse versie.
Mien website heet WUV en dat steet Wiele uut Vodden <Ho`w kwam ie`j op `t idee um `n website te beginn`n?
Umdat ik nogal wat bezig wazze met `t weer, bun`k met hulp van Gerrit Vossers uut Silvolde hiermet begonn`n. Ie`j mot gegevens bewaren en toen dacht ik, weurum niet op `n site. En och... knieperige Hollanders da`w bunt, bie`j UPC krie`j dat veurniks en da`s mooi metgenomm`n. Ik bun geboren en getogen in Vodd`n en alderbastend trots op mien dialect. Onze kinder (2 jongens en `n dearn) he`w in de joaren 70 opgevoed in `t Nederlands en dat vind ik eigenlijk `n betj`n jammer. Zo gruu`jt `t dialect d`ruut. De klank van de taal geet verlor`n. Zelfs mien eigen dialect is iets verdrea`jt umdat mien moeder vrogger uut Zutphen kwam. Ie`j wet wel, Zutphen is `n stad woar ze achteruut liepen terwijl ze in Vodd`n al veuruut konn`n fietsen.
O`w site heet Wiele uut Vodden, veur zover ik `t kan vertal`n is dat "Wij uit Vorden", ho`w bun ie op den name gekom`n?
Ik magge gearn `n kaartj`n sturen naor luu die,`j langer dan `n griepj`n, zieke bunt. Meestieds is `t dan `n kaartj`n uut Vodd`n.
Altied en eeuwig sluut ik dan af met de groet`n van Wiele uut Vodd`n. Toen d`r dan ook `n name bedacht mos wodd`n, was dat neet zo moeilijk. Mien e-mail adres is d`r ook naor vernuumd: wuv@chello.nl
Woar geet o`w site oaver?
Hoofdzakelijk geet `t oaver `t weer. Eigenlijk bun`k `n natuurkieker. Ik hebbe gin computergestuurde apparaten um `t weer te volgen, maor bie`jnao alles is olderwets. Een 100% contra barometer woaran ook zichtboar de 75 cm. kwikkolom um de luchtdruk te mett`n. Een stormglas waaruut ič`j op korte termijn `t weer kunt afleaz`n. Ie`j ziet dan veranderingen in `n vloeistof die`j `t één en ander angeeft. Mien grootste liefhebberie`je haal ik uut de natuur. Ik mag gearne kiek`n naor de gedragingen van de natuur um doaran de weersveranderingen te kunnen afleaz`n. Naost `t weer mag ik gearne schriev`n. Zo bunt ook mien vertelseltjes ontstaon. Inmiddels 159 stuks.
Ie`j vertelt dat ie`j weeramateur bunt, wat is dan o`w beroep?
Mien beroep is bouwtechnisch opzichter. Ik werk bie`j `n woningcorporatie (proWonen). Mien werkgebied is Vodd`n, Reurle en Borculo. Ik bun in 1966 begonn`n in de bouw en heb van mien oom (den was köster) de kneepjes van `t weervak geleerd. Wanneer d`r vrogger vorstverlet wazz`n, dan keek he`j naor de maon en vertell`n mien dat `t ging deu`jen umdat de maone `n dasse umhad. D`r hing `n waas um de maon en dat verkloaren `t vocht in de loch. An de kleur van de beume ku`j onder andere zien dat `t geet deu`jen. Ie`j hebt net ezegt dat d`r vertelsels op staon en gelieke schrieft ie`j ook op onze site dialectstukskes, bun ie`j ook cabarettier of bv schriever?
Ik hebbe altied al gearne meugen schriev`n. Meestieds was dat veur brulft`n en jubilea van collega`s en dergelijk`n. De vertelsels wordt ook in `t buut`nland geleaz`n. Niet umdat `t zo goed is, maor umdat `t luu uut Vodd`n bunt die`j zo op de heugte wordt geholl`n van `t één en ander. Amerika, Canada en zo bunt d`r nog völle meer. Ho`w kom ie`j aan de weerspreuk`n, haal ie`j die bv uut de Achterhoekse almanak of heb ie`j die uiut oaverlevering?
Ook internet hef in Vodd`n zien intrede gedaon, maor völle van de spreuken heur ik bie`j olde luu woar ik kom en dan schrief ik ze op.
Zo blif d`r toch nog iets bewaard. Heb ie`j naost o`w website nog meer benullighede`n op dialectgebied?(ik denk hierbie`j an de vraoge van umroep Grolle)
Ik mag gearne praoten met luu en dan `t liefst in `t dialect. In disse taal kan`k mien emoties `t beste kwiet.`t is dan meestieds Plat, Hollands of deur de neuze! Wil ie`j nog iets kwiet wat ik vergett`n bun?
Wie`j hebt mekare nog nooit getroff`n en toch he`k `t gevuul da`k mien bie`j jullie (site) thuus vuule. Al is `t alleen maor um `t dialect te promoten!!! Nuum nog éne kere o`w site, zodat de luu die`j nie`jsgierig bunt ewodd`n `n kiekj`n gaot nemm`n.
Dus.... Met `n volle toet`n vol groet`n en t"t kiek op Wiele uut Vodden Bedankt voeur o`w gesprekj`n.
Doar he`j `t veur!!! Wilt u nog meer van Harry lezen, kijk dan in de Leeszaal.
