LEESZAAL - ARCHIEF Hier vindt u verhalen van Wim Bluemers Welkom in het
MAOR WEL HEITE
Enige jaoren geleden, en dan praot ik wéér oaver de veurige eeuw, wodd`n d`r hier in Vodd`n en wie`je umstrek`n ook wel us vekansie eholl`n. En dat d`r af en toe ook wel us buut`n de deure wodd`n egett`n mag o`w wel duud`lijk weaz`n. Zo geet `t Ganzenpen ook wel us af en too. Wat zal ut weaz`n? In de afgelop`n tied is d`r enige bereuring ontstaon in de huusholling van Tinus van de Rösser. Zien Gerdientj`n is wat krang op `n draod en hef gelieke wat maleur met de höppe. Waarschijnlijk niet van de hertensprong maor tóch is ze`j op `n mooie aovend uut bedde gevall`n. Al met al hef `t `n hele tied geduurd eer d`r werk van wodd`n emaakt, maor dan tóch wordt d`r deur gesprokk`n en mot de huusarts komm`n. Gelukkig veur de luu is de huusarts met vekansie en wordt `t met de verwiezing naor andere nummers niet makkelijker op veur de luu van de Olde Rösser, dus dan maor niet bellen. Endelijk hef Ganzenpen `t bie`j `t rechte ende en tillefeneert naor de huusartsenpost in Zutphen. Gin beklag maor as ik de beide luu nog ens hier an huus kriege, za`k ze álle huuke van `t huus laoten zien én vuul`n. Niks he`k d`r veur oaver um d`r `n goed woord oaver uut te breng`n. Ze`j bunt (veur disse ervaring) bie`j Ganzenpen volledig uut de ban geraakt. Jammer da`k ze nog heb verteld dat ze`j de tassen met instrumenten hadd`n laoten staon want anders zo`k zéker better werk kunnen leveren dan wat ze`j dén aovend hebt gedaon. Het lijkt me géén opname meneer Ganzenpen, daar zullen ze in Zutphen niet blij mee zijn, was `t verhaal van de arts!!!! Lek mien de buule van Zeilstra, gloeiende gloeiende bakplaat hasses!! De andere margen kump dan de eigense huusarts en vervolgens wordt Gerdientj`n opgenomm`n in ut ziekenhuus dus mot d`r iets veur de Olde Rösser, want den blif an de Wassenaarseslag naobie De Leuke, wodd`n gedaon. Umdat Ganzenpen gewend is an scherp voer, steet d`r altied `n pötj`n met gerei wat scherper is dan Sambal en dat dut de Olde Rösser andachtig kiek`n naor ut pötj`n. Wat is dat veur `n goedj`n, was zien vraog? Oh, dat is `n soort Sambal maor dan `n maol of wat scherper. Umdat d`r macaroni op taofel stond, lik `t um wel iets um d`r maor iets van te gebruuk`n. Ganzenpen waarschuwt um d`r toch maor weinig van te gebruuk`n, maor ut zol Tinus van de Olde Rösser niet weaz`n at he`j zich doar iets van antrekt. De luu wordt zogezegd op de olde dag ietwat "eigenwies". Altied zol ik zegg`n da`j trots mot weaz`n op o`w "eigen wiesheid", maor in dit geval was dat toch niet zo. He`j is zo iets van "a`j um vandage doodschiet, mo`j um margen umme stot`n". Dus niet `n mespuntj`n maor geliek `n halve vörke. Effen reur`n en umdat de kleur niet dreks verander`n, nóg maor zo`n halve vörke. Ut "bloemendearntj`n" pakk`n alvast `n glas met water, maor de Olde Rösser mos d`r niks van hebb`n. Héérlijk, da`s echt fijn en tegeliekertied kwam d`r stoom uut de or`n en begonn`n um de ogen van eigens nat te wodd`n. Deur etten en niks laoten merken, mot he`j gedacht hebb`n. Maor dan kump `t moment dat um toch alles in de brand steet. Soms wilt olde luu wel us spontaan `n klein earpeltj`n uut de panne laoten glieren, maor disse keer hield de Olde Rösser angstvallig de koektrommel geslott`n. Fo`j, da`s toch aardig heite, kwam d`r met `n hees stemmek`n uut! Zien hele bord kiepen he`j weerumme in de panne en dan maor reur`n, in de hoppe dat ut minder scherp wodd`n. Dat helpt bie`jkans niks maor toch, ie`j prebeert wat. Zien volgende possie wodd`n oavergott`n met appelmoes en dan maor schepp`n. De wekke doarop bu`w met mekare naor de chinees in Vodd`n ewes, en op de vraoge of d`r nog Sambal bie`j mos, hoev`n wie`j enkel de Olde Rösser maor te volgen. De Rösser is met zien bie`jnao zesentachtig joar nog blinders actief in de moestuin en zukke ding`n mot niet veranderen umdat d`r ett`n an huus kump, want uutendelijk steet de diepvrieskaste niet veur niks (bie`j Ganzenpen) in de kelder. Wat mien betreft mag de Rösser honderd joar wodd`n al was `t alleen maor um zien amparte humor en natuurlijk zien blinders lekkere gruunte uut`n hof. Zo no`w is `t veur disse wekke weer genog al wi`k o`w niet ontholl`n dat d`r af en toe een rondleiding wordt geholl`n bie`j Ganzenpen in de Kanarische Weilanden en bie`j ut Meer van Mienneave. De luu wordt dan deur Ganzenpen uutleg gegeven oaver ut weer en zien eigenaardigheden. Völle drukker as no`w mot ut niet wodd`n zegt zien Sedoniaatj`n, maor dat Ganzenpen daor zelf anders oaver dech dat is zeker en veur de rest `n toet`n vol groet`n.
Veur gruunte en earpels hoev`n wie`j niet te zörgen en af en toe `n stuk van `t beest was zéker welkom.
De komm`nde wekke kan zien Gerdientj`n weer op gehaald wodd`n vanuut `t ziekenhuus en zal d`r veur de Olde Rösser en zien Gerdientj`n etten an huus wodd`n verzörgd.
