Welkom in het

LEESZAAL - ARCHIEF

Hier vindt u een verhaal van Harry Jansen uit Vorden, die ik in de Leeszaal geplaatst heb.

Enige jaoren geleden, en dan praot ik weer oaver de veurige eeuw, was d`r een inwoner in ons darp dee nogal moeite had met de regels van de oaverheid. We`j nuumt um vanaf no`w Batmutsenkear`l. De Batmutsenkear`l hef zich `n gewoonte angemett`n de`j niet veur iedereen te begriep`n völt, wat wil `t geval. Op `n dag wordt de Batmutse op karwei gestuurd met de bedoeling in `n huus enkele klussen te klaoren. Eén van de kluss`n was `t kuisen van een vloer. Daor bunt vandaag de dag middelen die `t milieu niet antast. No`w, veur da`k wieter vertel wi`k kwiet dat de hele rompslomp um `t milieu ons eerdaags de dasse umdut. A`j `n scheet laot mo`j al `n ontheffing anvraog`n, en dat was toch eerder neet zo, ie`j konn`n vri`j van o`w af blaozen en laot`n o`w af en toe `n koekje uut de trommel vallen of `n earpel uut de panne ploff`n.

Maor terug naor de Batmutsenkear`l, he`j geet met de bedrijfsbus naor `t karwei en fikst `t ene klusje naor `t andere en tot slot nog effen de vloer kuisen. De Batmutsenkear`l pakt uut de auto de middelen die hier veur staot en göt daor iets van in `n emmer, iets onder de fokke hen kiekend völt um de hoeveelheid in de emmer ietwat tegen en grip vervolgens nog `n flesse. Op disse flesse stond met grote, duud`lijke letters en tekens da`j dit niet mot mengen met andere producten. Toch maor doen dech de batmutse, want regels bunt d`r niet veur um, en d`r ontsteet `n gruwelijke damp en de kleur van de loch lög d`r neet umme. Hoestend en proestend kump de Batmutsenkear`l naor buut`n en vraogend naor de oorzaak was neet meug`lijk he`j wol d`r niks van wett`n.

Maor um op de titel te komm`n, dezelfde Batmutsenkear`l hef dus `n hekkel an regelgeving en wil zodoende zien eigen gang gaon. Op `n vrie`je dag hef he`j de zage en de biele uut de schure grepp`n en begunt te houwen en knoev`n in de rode beuk veur `t huus. Den boom had um al jaor`n in de wege gestaon dus zal de beuk d`rin en de beuk d`ran! Op dat moment kump Gradus Ganzenpen d`r langs rie`jen en zut de um in de boom zitten met de zage en de biele. Terug op de zaak belt Gradus naor `t huus van de batmutsenkear`l en Gradus dut zich veur as dienstdoende ambtenaar van de gemeente met de mededeling dat d`r is geconstateerd dat de beuk d`ran geet en d`r geen kapvergunning is gevraogd en tevens vrög de ambtenaar of misschien de Batmutsenkear`l in de bewuste beuk zit.

Nee, nee zegt `t Hennek`n van de Batmutsenkear`l , mien menneken is op `t werk en kump pas tegen vief uur thuus. Gradus ganzenpen wist drommels goed of he`j an `t werk was dus begint Gradus ietwat te protesteren en vrög of d`r dan iemand anders in de beuk kan zitten. En wéér ontkennen en ie`j kunt `t geleuven of niet maor d`r lag al veur `n half kerkhof an beuken tekke op de grond en nog volholl`n dat d`r niks gaonde is in de beuk! Toen hef Gradus maor langzaam en veurzichtig bekend. Hennek`n slaakt `n zucht van verlichting en hef de Batmutsenkear`l neet eerder op de heugte gebracht tot dat ze`j zeker was dat he`j veilig en wel op de grond stond en de beuk d`r nëven lag.

En ok dat is waor gebeurd in de buurte van De Leuke.