Deze pagina is vernieuwd op 25 oktober 2007
JEHOVAH EN DE HOND Enige jaoren geleden, en dan praot ik weer oaver de veurige eeuw, woonde Gradus Ganzenpen in `n nieuwbouwhofje an de rand van `t darp. Rondum huuz`n met allemaol jongeluu die net as Gradus en zien Sedoniaatje bunt begonnen met de grote stap in`t leaven. Allemaol de tuin opknappen, de een was d`r nog drukker met dan de ander. Altied de vergissing begaon um `n klein beumken in de veurtuin te zetten die later, zoas zovaak bliekt, völ te groot bunt um te handhaven. Bram Tinspatter had de pech dat zien achtertuin in de bouwperiode een standplaats was veur zwaor materieel. Bram hef met de kango de tuin umgemaakt um beplanting meug`lijk te maken. Zelfs `t onkruud kwam niet deur de harde korst naor boaven. Zo`n hofje hef veurdelen veur bewoners maor ook veur instanties en dergelijken. Wat wil `t geval: Op zaoterdagen wordt d`r `n blik met collectanten lös gelaoten en begint op `n veur völle luu verkeerd moment van de dag an de deure te bellen um de een of andere leer te verkondigen. Jan van de Pers kon toendertied nogal nösterig uut de hoek kommen en gaf veurdat ze an de deure kwammen al an de Bouvier lös te zullen laoten zodra ze an de deure belt. Gradus Ganzenpen kon vanuut de veurkamer op de veurdeure van Jan van de Pers kieken en wachtte vol spanning op wat gebeuren zol. Daor he`j ze, riep Gradus naor zien Sedoniaatje en no`w maor afwachten op de grote brul van de hond en `t gereer van collectanten. Een schriel kearltjen met aktetas en een vrouw waor ie`j op kekken asof `t een sleufk`n was, loopt naor de deur en drukt op de bel. Daor geet de veurdeur lös en steet Jan de leu te woord. Gradus dech `t ziene d`r van, misschien is de hond plotseling onpasselijk gewodd`n of heb ze de hond niet wakker gemaakt um waaks te we`zen. De luu verlaot `t pad met een bekend gezicht waorvan af te leazen viel "alweer gin volgeling gestrikt"!! Gradus wacht gin moment en pakt de telefoon! Goede morgen, u spreekt met Jan van de Pers. Goede morgen mijnheer, mag ik u iets vragen? Jazeker, was `t antwoord van Jan, he`j was zogezegd bie`jzunder metgaond. Mijnheer, zijn er bij u collectanten in de buurt? Jazeker, ze`j Jan van de Pers, ze zijn hier net geweest. Och, wat jammer was `t vervolg, ik moet er dringend een spreken in verband met een onderbezetting aan de andere zijde van uw hofje. Kunt u voor mij kijken of er nog iemand aan de straat te vinden is? Moment, ze`j Jan, ik zal even voor u kijken. Toen Jan van de Pers de veurdeure uutkwam um te zuuk`n naor den collectant deed Gradus de deure ook lös en vroog Jan: Waor blif toch den hond van o`w? Toen viel bie`j Jan van de Pers `t kwartje!
En ok dat is waor gebeurd in de buurte van De Leuke.
