JONG GELEERD, OLD GEDAON........!!!!

Vrogger, en dan praot ik oaver de veurige eeuw, toen de hond nog uut de konte blafte`n, en wel in `t jaor 1967, begon Gradus Ganzenpen as bouwvakker(tje) bi`j `n plaatselijke annemmer hier in`t darp. Van alles mos Gradus toendertied leren en later ook kennen. Zo`as ze dat destieds zei`jen "met moeders naor bedde, de koe naor de bolle en zwaore shag rok`n". Dus ook Gradus Ganzenpen.

Veur zien éérste sollicitatie löp Gradus van huus naor de straote waor den annemmer woont, niks, maor dan ook helemaols niks hef Gradus veurbereid. Sterker nog, van gin toet`n of blaoz`n hef he`j ooit iets met gekregen oaver solliciteren. Maor laot zo wez`n, Gradus kump bi`j de betreffende annemmer en samen met een andere sollicitant staot zie`j ietwat beteuterd te kieken naor `t huus waor de annemmer woont.

De annemmer zelf kump, deur de grinte, op hun anlopen en begint al raps met Gradus medesollicitant te praoten. Vlage`n van `t gesprek krig Gradus met, en heurd`n zegg`n dat zien vader `n "goe`jen" klant was en dat he`j deurumme veur Gradus Ganzenpen hef gekoz`n. Dat getuugd van eerlijkheid, dat mos Gradus um naogev`n. I`j kunt bi`j ons komm`n werken, was zien zeggen, en kom dan maondag um kwart oaver zeuven hier! No`w, dat hef Gradus in zien oren geknupt en is daorop naor huus gelop`n.

Maondag nao de bouwvak, löp Gradus Ganzenpen naor de werkplaats, kist(je) met gereedschap op de scholder! Ietwat verleage`n zegt Gradus goe`je margen en raps kiekt d`r enkele, niet geheel onbekende, collega`s um in de snoete. Ik zal ze voorts in mien verhaal Harm Harley en Hendrik uut de bochte nuum`n. Eerst wat gerei bi`j mekare zuuk`n en vervolgens met `n olde Opel Kaptein naor de Kranenbarg.

De laegere schole (Antonius College) zol nieuwe kozien`n krieg`n en daor waren zie`j `t juuste koppel veur. Hoog zommer en goed heite dat was `t! Beginnen met `t graven van gaete um de holten steigermasten in te zetten. Hendrik uut de bochte was mien leermeister op dat vlak. Zwaor waren de paolen en zeker de anbinders die Gradus en zien collega`s toen nog met touwen vast mossen knuppen.

Umstreeks half drie ze`j Bear`nd ( de baas) toe Gradus, gao i`j maor naor dat café en haal is wat bier. Stel o`w veur, Gradus Ganzenpen was nog niet völle bier gewoon, sterker nog, he`j had eigenlijk nog nooit bier gedronk`n. Bi`j `t café angekommen met `n grieze specie-emmer deed Gradus zien bestelling: 3 halve liters en één fles Groli. Op de werkplek zittend en leunen met de rugge tegen een steigermast ging `t van plof, plof, plof en psssst. ( den laatsten was de limonadefles van Gradus.)

Toe Gradus, a`j met wilt in disse wereld mo`j bier drinken en gin limonade, was `t gene wat Hendrik uut de bochte um zei. De volgende zommerse dag maak`n Gradus weer de gang naor `t bewuste café en deed de bestelling: 3 halve liters en één donkeren. Op de zelfde wieze as de veurige dagen werd er gedronken en weer kreeg Gradus de opmerking van de opperman oaver `t leren drinken. Luusterd zei Hendrik, margen nem i`j van huus `n tuutj`n zolt met en dat gebruuk i`j nao de halve liter, dat breg o`w op de goe`je weg!!!??

Umdat Gradus nogal naïef was en he`j ok wel iets wol leren ging Gradus met die boodschap naor huus. De andere margen, in de broodtrommel, met een jachttafereel op de deksel, 14 sneetjes brood en een tuutj`n zolt naor de Kranenbarg. Die middag weer dezelfde gang en een bestelling van, jawel, 4 halve liters! Op dezelfde wieze tegen de steigerpaol zittend en geliek opgaond drinken met Hendrik en Harm. Een gruwelijkse slok vond Gradus `t wel maor i`j wilt wat leren, toen dat schepje zolt d`r achteran.

Ik hoef ik niet verder te schriev`n want i`j kunt `t vervolg wel raoden. Die middag hef Gradus niet völle meer uutgevoerd as egaal naor de krane lopen um te drinken. Alleen Hendrik en Harm hebt hier schik van gehad, Gradus zelf had den dag meer dan gewone malleur in de boek. Luu die Gradus Ganzenpen kent zult wetten dat he`j `t wel geleerd hef en dat he`j `t nog steeds gebruukt,

En ok dat is waor gebeurd in de buurte van De Leuke.