Deze pagina is vernieuwd op 25 oktober 2007
Van `n kolde karmisse komm`n!!
Enige jaoren geleden, en dan praot ik weer oaver de veurige eeuw, hef Harm van d`n Kranenboer zich, in de opruuming, `n uutbreiding op zien kleerkaste toegestaon. Strak deftig zol Harm d`r bie`j lopen um de kommende dagen met de karmisse extra indruk te kunnen maken op zien Maria. ,p>Harm zag d`r uut...een prachtig donkere bokse met extra wie`je piepen en d`rop een extra sterk getailleerd oaverhemd met braobantsbonte ruutj`s. Zien lichaam zol d`r anstekkelijk uut komm`n te zien en he`j vond zichzelf maor al te mooi en he`j liep zo trots as `n pauw deur huus en egaal kiekend in de roete en vervolgens op de klokke want zien Maria zol zo komm`n. Hen en weer deur de kökken zenuwen op zien nie`je schoenen, met `n punte waormet ie`j `n vliege in de konte konn`n schuppen, die he geliek maor extra in de glans hef gezet. Daor zut he`j vanuut de bongerd zien Maria ankomm`n. Harm löp op `n draf, vanuut de grote kökken naor de achterdeure. He`j verget deur `t broez`n van de hormonen te bukken dus batert met zien veurheufd keihard tegen de boavendeure die`j nog in de sponning stond. In plaats van Maria te pakken en smakken `t dearntj`n fatsoenlijk op de snoete wrif Harm zich eerst de traone uut de ogen. Harm met `n bult as `n ei op de kop samen met zien Maria toch naor de karmisse gegaon en ze`j hebt d`r toch nog een aardige dag van wetten te maken. Zo as `t vrogger beheurd`n breg Harm Maria op de fietse naor huus. Dat thuusbrengen hef `n hele tied geduurd en wat daor zoal gebeurd is löt o`w raoden maor deur de klap tegen de boavendeure is de hormoonhuusholling niet biestervölle verandert dus........ Harm grip `n tied later de fietse en trea`jt in`t duuster diep in gedachten verzonken huuswearts, he`j wet zich de weg nog te herinneren, zo dech he`j. Helemaol in gedachten van de wieze van afscheid nemmen in de frisse loch kik he`j schuun naor beneden en trapt as`n bezetene op huus an. Inplaats dat den sukkel no`w veuruut kik, maor nee in volle gang `n afgraving in jagen. Harm zakt met de fietse tot en met de trappers in`n drek en vecht zich te bastend um d`r weer uut te kommen. He`j zut d`r niet uut, maor `t is donker dus wie`j zut um no`w? Dan bedech he`j zich dat zien hele nie`je uutmonstering onder de drek zit. Bie`j huus `t erf op jagen en de fietse neaven de niendeure tegen de muur plaatsen um vervolgens `n zinken melkemmer met water tegen de fietse te smakken zodat de drek d`raf is. Onder `t vale schiensel van de buut`nlampe lik `t aardig dus nemm`n`um met um `t ding op de deale te zetten. Gelukkig niemand is wakker gewodd`n, totdat de achterdeure lös geet en zien ongetrouwde oom strompelt naor buut`n um de kipp`n te voeren met `t restant van de letste gehaktbal. He`j steet hikkend in `t schiensel van de dealelampe en Harm zut dat zien oom ook naor de karmisse is gewest. Gelukkig dech Harm, den merkt d`r niks van dus stapt veurzichtig naor binnen en trippelt zacht de trappe op um vervolgens met `t gezicht um de deure van de olderslaopkamer an te geven dat he`j d`r weer is. Das goed gegaon dech Harm en trök zich alle kleren uut en hunk ze oaver de stoel. He`j löt ongewild de slaopkamerdeur vanuut bedde `n paar keer veurbie komm`n maor völt toch nog raps in slaop. De andere margen steet moeder Miene, Harm zien moeder in `t deursgat en beklag zich oaver de loch den vanuut `t bedde naor buut`n wil. Onder an de trappe steet veur o`w `n emmer met sop, `n dweil en twee bessems te wachten en doarnao ku`j o`w oom helpen de stal uut te mesten. Harm kik eerst héél onschuldig in de ogen van zien moeder maor zut al raps de ernst van den blik!! A`j naor de karmisse bunt gewest zut alles d`r aardig uut maor de andere margen bliekt pas dat de drek van de fietse vanaf de achterdeure tot veurbie de opkamer de trap op is gekomm`n. De voetsporen vanaf de nie`je kokosmatte en vervolgens op de traploper naor zien slaopkamer. Niks is d`r meer schoon. Dat Harm den dag druk is gewest met huusholdelijk werk mag duudelijk weazen en dat he`j d`r bie`j zien Maria niet alles van hef verteld mag duudelijk weaz`n. Gaot d`r vanuut dat dit werkelijk is gebeurd in de buurte van Lichtenvoorde en a`j wilt wett`n um wie `t geet za`k `t o`w laoten wett`n, maor .... dat Ganzenpen daor anders oaver dech is zeker!
