Deze pagina is vernieuwd op 25 oktober 2007
Kind kwiet
Enige jaoren geleden, en dan praot ik wéér oaver de veurige eeuw, wazz`n `t niet zo druk bie`j de scholen as tegenwoordig. Gradus Ganzenpen kump geregeld oaver `t Hoge en `t is daor bie`j de schole dan ok altied donders oppassen. De kinderen komt tegenswoordig niet meer lopend of op de fietse naor schole, nee, nee, ze`j wordt gebracht met de auto. An de Schoolstraot, Dr. Lulofsweg en an `t Hoge steet `t man an man met auto`s. Veur een ieder die`j wat vaker oaver disse weg kump is `t een bekend probleem. De deure van de auto lös en de weg veur de kinderen vrie`j hollen bie`j `t uutstappen. Soms kiekt de moeders de chauffeurs van de auto`s ietwat ondeugend an met `n blik van "ku`j niet ergens anders hen gaon, ie`j ziet toch dat onze studentjes naor `t Voddens College gaot". No`w bunt de kinderen tegenwoordig nogal druk met computerspellekes en dat soort dingen. De hoepel, springtouw, knikker of zelfs `t hinkelen wordt niet meer gedaon. Jammer maor `t is no`w eenmaol zo. De ruumte die`j vrogger veur dat soort spellekes neudig wazz`n ligt nog altied rond um de schole. Wanneer wie`j no`w de ruumte veur en tussen de grote rode beuken benut um de auto te parkeren (en dat geldt natuurlijk ook veur de schole an de oaverkante) kan `t verkeer d`r gewoon langs en kunt de luu net zolang met mekare kletsen dat `t hun uutkump. No`w mo`j niet denken dat d`r helemaol gin fietsende moeders (en af en toe vaders) bunt. Nee, d`r bunt ok nog mensen die`j de kinder op de fietse naor school brengt. Luu die`j thuus druk bunt en af en toe bie`j de schole deur andere luu an de praot worden gehollen, wilt soms de gedachten effekes stille zetten. Zo ook, de vrouw van de de zoon van de bewoner van `t witte huus an de Reu`lseweg. Op `n mooie margen brengt ze`j de kinder veilig naor de schole en um zeker te weaz`n dat de jongste telg thuus niks uutvret hef ze um met genommen naor de schole. Het Brunadearntj`n kump an de praot met andere luu en de jongste telg spölt al raps met `t rondslingerend spöllegoed. Toen de vrouwluu uutgepraot wazz`n, speerde `t Brunadearntj`n naor huus want daor mot `t werk gedaon worden. Goed en wel thuus geet de tillefoon en `n stem an de andere kante vrög heur of ze`j niet iets mist. Vuulend naor de knippe en de tasse al raps antwoorden van "nee, ik mis niet iets!" Weet u zeker dat er niet iets ontbreekt, vrög de andere kante nog eens en begint al iets te zinnespöllen op de kinder. En toen verkleurde `t Brunadearntj`n van kleur, maor gelukkig kon de sprekker an de andere kante van de liene dat niet zien. Ze`j had in alle drukte de jongste telg vergetten met te nemmen naor huus. Och dat kan `n ieder wel overkomen, sprak de meister maor of ze`j dat nog hef geheurd valt te betwiefelen want as `n speer hef ze de kleinen weer opgehaald. Maor wanneer wie`j `t toch oaver de parkeerproblemen in Vodd`n hebt, kan ik `t niet laot`n um `t weer an te halen. Laot Hannes van Stoppen Jan zo hier en daor met de kwast de trottoirbanden veurzien van een geel likje. Meugelijk dat wie`j dan wat makkelijker deur ons darp kunt ried`n, maor dat Gradus Ganzenpen daor soms anders oaver dech, dat is zeker!
