KOMPJOETER KOOP'N IN AMSTERDAM

Ik was afloop,n sommer veur un daggie naor Amsterdam ,um un betje um mie hen te kiek’n, was der al un tiedjen neet meer e’wes.En um da’k neudig een nieje kompjoeter neudig hadde, den old’n dee ik noe hadde is de leste dree jaor kats verslett’n, deur ut gekompjoeter met Mariline en gesörf deur eur website en ik mot ut hille pannel van Mariline nog filciteern, dus ’n nieje most der komm’n ,dus mien olde sökke achter uut de beddestae e’haald en daor met op Amsterdam an.

Now kön ie daor de Yellow Bike pakk’n of g’woon op de tram spring’n, ik hadde mie beslott’n um de tram tepakk’n en mie rond te laot’n veur’n, maor jao das ook neet alles. Mariline moch will’n dasse zovölle bezeukers op één dag op de website kreeg, foi ,foi wat’n drokte daor,toon’k instapp’n mos ik al wring’n um binn’n tekomm’n, de old’n vandaag’n stond’n in’t gangpad en de jongeleu laag’n lank uut op de baank’n,uut e’dost met völle iezerwark in oorne en neuze en stempels op arme beene en waor alneet meer, kon mie der wal wat bie denk’n waor nog meer zat.

Maor ik stonne nog maor net, toon in de Kalverstraote ’n paar vrowleu instapp’n met van dee bontvell’n umme en goldwark um de nekke en pols’n.
Ik kon ze al in de wiete roek’n foi wat un scharp’n loch hadd’n dee bie zich, ik zegge zo teeg’n dee juffer, nou mevrouwtje dat ruikt nogal sterk, in mien beste hollands ja,ja, zegt dat vröwke, dat is van Co Co ,ik zegge van Co Co !? ja,ja, Co Co Chanell je weet wel ,zo’n klein flesje, kost 400 Euro, in gin 400 jaor dach ik bie miezelf, maor dat andre wiefke kwam ondertuss’n ok kot bie mie staon en begon al verdach teeg’n mie an te schurk’n en te draej’n en Meneertje wat vind u van mijn geurtje !? en zee krop met eur hele hebb’n en hold’n stief bie mie onder de neuze zoda’k in ens un wieds uutzicht hadde op de bargen van Oost’nriek, dat is van Sabatini je weet wel van die Tennister ,Zal wal dach ik bie mie zelf, zoon klein flesje 300 Euro zeg die dame en drukt alles nog es stief onder mien neuze, ik zegge, voor zo’n klein flesje!!
Dat is voor mij bijna een weekloon dame ,zeg ik .
Wat voor geurtje gebruikt U dan vraagt de Dame in kwestie.

Zee baog zich veuraover um an mie te roek’n , mien hatte sloog wal dree keer aover wa’k toon ollemaol te zeen kreeg, wist neet dat der zulke deepe daal’n waar’n tuss’n de barg’n, ut vröwke snaof es een paar keer deepe in en zei ik ruik helemaal niets.

Der kwam un grijns op mien gezichte ,ik zegge in mien onvervalst Achterhooks ut mark is C duuzend kost 99 cent de grootste pot van de geurlijn Broeneboo’n en toon leet ik mie d’r eene gaon en geleuf ut of neet toon zat der net zovölle volk in de tram as bie Mariline op de website as zee de stekker uut eur compjoeter hef e’trokk’n en toon kon’k mooi zitt’n zelfs de beene lank uut legg’n en dat veur 99 cent bie C duuzend.

Maor ondertuss’n ha’k nog gin ni’jn compjoeter, dus leet ik mie maor afzett’n bi’j ut Waterlooplein en daor was zat, daor he’k mie der eene e’kocht was in de anbeeding hee wol der maor 45 Euro veur hebb’n da’s toch gin geld of neet dan, stel ow veur ,kan’k mie veur 45 Euro weer meel’n met Mariline en sörf’n da’s jao toch veur niks of neet dan en dee moes kreeg’k der veur niks bie.

Zo Mariline ik bun weer standbie en wol ow filseteern met ow dree jaorig bestaon, van Harte filseteerd en een dikk’n Smok veur ut hele pennel en op naor ut vief jaorig jubileum. De Grootnesse Joop

Dit is geschreven door Joop, als felicitatie voor ons driejarig bestaan, Joop bedankt , we vonden dit erg leuk