Welkom in het

LEESZAAL - ARCHIEF

Hier vindt u verhalen van Harry Jansen

Enige jaoren geleden, en dan praot ik weer oaver de veurige eeuw, is Gradus Ganzenpen iets oaverkomm`n wat nog niet geheel wereldkundig is emaakt. Veur de luu rondum Gradus is `t bekend dat he`j `n goe`jen etter is.

Verleden jaor is d`r verteld hoe Gradus as jongen naor zien werk ging. In `n olde legertasse de grote broodtrommel met op de dekkel `n slipjachttafreel. In de trommel 14 snee brood en `n dreuge metworst. In de ene thermosflesse de koffie en in de andere de tomatensoep. En toch had Gradus de enkels dikker dan de konte!

Op latere leaftied verandert Gradus van werk en hef he`j minder böttewerk te doen dus werd `t etten ok iets minder. Daags ongeveer 4 snee brood en af en toe `n dreuge metworst, vanuut de poppenverhuur (Gradus beurt per gebeurtenis 2 dreuge metworsten veur `t uutlenen van de Sarah of Abraham). Gaondeweg de tied begunt d`r al iets `n zwembandj`n te komm`n en de enkels blieft al ruum achter op de konte.

Lekker etten is onze hobby, verteld Gradus maor `t mot niet altied `n vette hap weaz`n. Ooit, in de jaoren tachtig, is Gradus met de kinder naor `n Mc Donald ewest in `t westen van `t land. D`r wordt `n kantonnetje onder de machine gehollen en d`r valt veur de kinder 12 en veur de olde luu 16 stökskes patat in. Op `n katonnen blaedje `n hamburger die`j veur `t zelfde geld as zunnebrilglazen kunt gebruuk`n.

Gradus hef `t afgeleerd en is nooit meer met de kinder naor zo`n tent gegaon. Onlangs hef een van de kinder Gradus metgenomm`n naor de Mc Donald op de Mars. De patat was iets meer maor de hamburgers bunt niet völle verbetterd.

Maor dit vertelseltje hef `n andere gebeurtenis te melden. Wat wil `t geval? Tussen de middag wil Gradus nog wel `s in de koelkaste kieken of d`r nog iets te snaaien völt, want brood is ok niet alles. Af en toe de laatste kolde schotel of `n paar haringen uut de diepvries. De hond stond meestal in de buurt van Gradus want af en toe viel d`r nog wel iets op de grond en dan is `n hond toch mooi metgenommen. Op `n middag kump Gradus in de kökken en loert in de koelkast maor zut verduld weinig van zien gading. Daor steet nog `n kliekje macaroni op de hoek van `t aanrecht. Da`s mooi metgenommen dech Gradus en zet `t bord effen in de magnetron. De hond steet op uut de mande en steet naost Gradus te wachten. Nee, nee zegt Gradus tegen de hond, disse keer is alles veur mien.

Plinggg!!! de magnetron völt uut en Gradus pakt `t bord. De eerste hap gef al direct `n bie`jsmaak maor veuruit, nog `n scheut ketchup dut wonderen. Al `s een keer `n hondeheurk`n van van de rand gehaald maor toch `t wordt naor binnen gewerkt.

Toen Gradus `s aovends thuus kwam en Drika vrög hoe `t um vergeet verteld Gradus dat he`j iets maleur op de boek hef en den middag ok al drie keer naor `t huusken is gewest. Wat he`j dan, vrög Drika? He`j wat verkeerds gegetten? Nee, zegt Gradus, ik hebbe vanmiddag `t kliekje macaroni opgemaakt maor misschien he`k wel te völle ketchup gebruukt. Drika begunt te lachen.....Die macaroni he`k vanmargen uut de hondebak gehaald en op `t aanrecht gezet um an de ganzen te voeren. Gatverdamme foeterd Gradus en probeert zien stommiteit ok nog op `n ander af te schoeven. Dat wordt mooi geld verdienen zegt Drika, want dan ku`j in`t vervolg samen met de hond etten,maor dat Gradus Ganzenpen daor anders oaver dech is zeker!

En ok dat is waor gebeurd in de buurte van De Leuke.