Enige jaoren geleden, en dan praot ik weer oaver de veurige eeuw, was `t veur Hendrik Neuzeman gebruuk`lijk zich dagelijks buut`nshuuze te vermaken. Zoals al eerder verteld woond`n Hendrik Neuzeman in de Mossels`n Enk an de bekke. Oaverigens is dat `n lokatie waor menigeen zich de vingers bie`j af zal lekken. Heel rustig wonen an een veurzichtig kabbelende bekke met `n uutzicht oaver een mooi landschap met op de achtergrond de kerke van d`n olden Cuyper.

Hendrik Neuzeman liet zich regelmaotig naor huus brengen um vervolgens zich in de stoel te laot`n zakken of zomeugelijk zelfs de beddeplanke nog an te doen. Wanneer hendrik zich op een aovend riekelijk te goed had gedaon an geestrijk vocht was `t motoriek iets ontstemd en wist Hendrik zich niet altoos alles meer in de juuste volgorde te onthollen. Zo as eerder verteld sprak Hendrik dan niet met de medegasten an de tap maor ging he`j met `t grootste gemak een gesprek an met zien fietse. "Kom maar fietsje, ga maar naast Henkie lopen dan komen wij wel thuis" was een van de onderwerpen die Hendrik besprak met zien olde Empo.

Al lopend en praotend langs de Reu`lseweg zocht Hendrik de terugweg naor huus. Dat `t veur Hendrik Neuzeman een hele trip was bliekt wel uut `t feit dat d`r al menig andere stamgast Hendrik achterop kwammen en um dan ook alle succes en nachtrust toewenst`n in zien gang naor `t Mosselse. Eindelijk kump Hendrik Neuzeman op `t lange pad naor zien stulpk`n en begint te zuuk`n naor de slöttel van `t huus. Eerst maor effen miegen mot Hendrik gedacht hebben en geet met de scholders tegen de hoek van`t huus hangen um vervolgens de afvalstoffen van `t geestrijk vocht via `t göttegat naor elders te doen gaon.

De volgende margen kump Hendrik langs `t huus oplopen en zut tot zien schrik dat d`r enkele pannen bunt opgeschoaven en `n klein hildeleark`n steet nog tegen de gevel. Snel naor binnen en kieken of d`r niet iets gemist wodd`n maor met `t besef dat d`r meugelijk nog vingerafdrukken mot wodd`n genomm`n, kump Hendrik nergens an en belt vervolgens de veldwachter. " Zeg veldwachter, moet je eens horen, ze hebben bij Henkie ingebroken" Veur de veldwachter is Hendrik Neuzeman niet geheel onbekend maor toch, he`j kump met de grootste spoed, op een witte bromfiets (DKW), bie`j Hendrik Neuzeman de kamp op rie`jen en begint al raps met `t gebruukelijke onderzoek. Waar is de inbreker binnen gekomen, was de vraoge van de veldwachter. Welnu, zo begon Hendrik Neuzeman, aan de zijkant van mijn boerderijtje zijn enkele pannetjes opgeschoven en het hildeleark`n staat nog tegen de gevel dus denkt Henkie dat ze daar zijn binnengekomen.

`T spoor van de inbreker leidde rechtstreeks naor de beddeplank van Hendrik en naor `n kort oriënterend gesprekje met Hendrik kwam de veldwachter tot de enige en juuste meugelijkheid en dat was dat Hendrik Neuzeman de aovend daorveur zelf via `t dak naor binnen is geklommen. Toch nog een redelijke bevestiging dat kinder, Hendrik Neuzeman en dronken luu zich niet makkelijk de bötte kapot valt!

En ok dat is waor gebeurd in de buurte van De Leuke.