Welkom in het

LEESZAAL - ARCHIEF

Hier vindt u verhalen van Gait den Strieker ofwel Gerbert Abbink.

SINTERKLAOSVERHALEN

Mien vader is jaoren Sinterkloas ewest bi-j on in ’t darp. Ik mog dan met as zwarte Piet. Dat was de tied dat der nog maor één zwarte Piet bi-j kloas was. In de meest vremde voertuugen bunt wi-j binnen ehaald. Open auto’s, boot op anhanger, koetsen en later ok nog ’t peard. De muziek halen ons dan ’n endje buuten darp op en dan naor ’t gemeente huus. Daor was dan de burgermeister die dan ’t welkoms waord sprak. Meestal was dat meer an de olders e- richt dan veur de kinderen.

De muziek verenigingen wollen niet meer spöllen as de ’snuupkes niet werd an-epast. Wat was n.l ’t geval, de blagen wazzen toen ok al wel ’n betjen opstandig. Zi-j gooien n.l de harde snuupkes weer terugge en die raken ok de muzikanten die hiellen daor niet van, niet allene veur zich zelf maor der kwammen ok deukskes in de instrumenten.
Nao de rondgang deur ’t darp naor de zaal. Bi-j ’t beklimmen van ’t podium zei ik’n kere, vader pasop met de staf. Toen heuren ik ’n jong deerentje op de eerste ri-je zeggen” das Ome Gerrit.”

As zwarte Piet mos ik mien in ’t Darp verstoppen, dat deed ik pas um negen uur ’s aovonds terwijl ’t halve darp al um zeven begon te zuuken.
’n Geluidswagen gaf af en toe an de zuukers deur waor at ik ongeveer kon zitten. Zi-j vonnen mien tenslotte in ’n vossegat(keldergat) bi-j de zaal.
De tweede kere laggen de groten blagen bi-j mien thuus op loer. Ik mos toen van alle sluupweagen gebruuk maken um an de anderekante van ’t darp te kommen. Daor krop in de kattebak van de auto van de veurzitter.
Toen wi-j ankwammen op de markt,gaf de omroeper weer ’n anwiezing. Daor wazzen ’n paar vrouwluu die ’t deur hadden. Ik heb nog eprobeerd um de kleppe goed vaste te hollen maor uut endeluk mos ik toch loslaoten. De vrouwluu hadden toen 75 gulden te verdelen.

Later heb ik met hulp, Sinterklaos anekleed en völle zwarte pieten zwart emaakt. Wi-j hebt toen ‘n kere stiekum in ’t boek van Sinterklaos ’n naakt foto e-daone. Toen de goed heiligman wol beginnen met de namen van de kinderen op te nuumen, stokken hi-j effen, de kleur op de wangen konnen wi-j deur de baard niet ziene.

Toen ik later veur ’t bejaardencetrum ok as Sinterklaos mos antreaden deden wi-j met mien dochter as Zwarte Piet, altied wel ies ampart. Met de gitaar, liedjes zingen, zusters die in verwachting wazzen trots rond laoten lopen, samen met de directie muziek maken. Umdat daor bi-jnao nooit ging kinder bi-j wazzen halen wij- ok nog wel us’n grap uut. De muiter af of de baard umhoge as te warm was, ’n oldere dame op de slippe van de Sint ’n liedje laoten zingen. Dat was ’n mooie tied. Now nog wel Sinterklaos veur de blagen van de buurt vereniging en soms veur oldere kinder van 65 plus.

Deur dat ik zelf ’n klein ringbaardje heb is de Klaosbaard moeiluk vaste te kriegen, dat gif nog wel us probleemkes bi-j ’t praoten, maor de echte geleuvers kiekt ow met volle overtuuging an. Bastens mooi um dat te ziene.

Tip veur de olders, wilt jullie de kinderen nog vaster overtuugen dat de Sint der echt is ewest, maak dan met ’n hoefiezer afdrukken in ’t zand. Altied succes.