Welkom in het

LEESZAAL - ARCHIEF

Hier vindt u verhalen van Gait den Strieker ofwel Gerbert Abbink.

SMOKS HANNE IS WEER E-VLAOGEN,

Hadden wi-j ’n bi-jzundere vrouwe in ons darp, is zi-j d’r weer van deur egaon en dat is neet de eerste kere.

Jaoren eleden ston zi-j op ’n mooi pleksken in de stationstraote. Hoge baoven alles uut kon zi-j de boel goed in de smiezen hollen. Daor bunt völle foto’s van emaakt um dat ‘t ’n bi-jzunder beeld was met maor ene klompe an de veute.

Dan inens is zi-j weg, zogenaamd umdat daor ebouwd mos worden, maor doar geleuven ik niks van.
Smoks Hanne vuulen ’t al lange an,zi-j is neet veur niks ’n hekse. Jaoren hef ze vrogger um de toorn evlaogen dus zi-j is d’r stiekum vandeur egaon op eur bessemstelle ,moar waor hen?

Nao ’n jaor was zi-j opens weer terugge, moar now op ’n andere plaatse.
Toen zi-j n.l. had eheurd waor ze ’t plan hadden um eur neer te potten, is zi-j eerst gaon kieken. Dat plaetsken ston eur wel an en hup daorzat zi-j an de mure van ’t olde stations gebouw waor de V.V.V eur kantoor kreeg. Now kon ze alles nog better bekieken en d’r was van alles op ’t plein te doene, dus vervaelen deed zi-j zich neet.

En toen op 1 juli van dit jaor ’t V.V.kantoor op-edoekt werd, is Smoks Hanne ok weer weg e-vlaogen.
Hebt vandalen dat edaone, steet ze now ergens in ’n schure en wilt ze losgeld hemmen.?

Ik geleuve daor niks van, zi-j is gewoon weer weg evlaogen en zit now ergens rustig af te wachten welke plaatse ze now weer veur eur uut- edacht hebt. Meugeluk is z i-j in ’t Wolfversveen opzuuk noar eur olde hutje, woar zi-j ewoont hef met eur zönne Plaggen Hendrik.
Maor zuuk daor maor es, zi-j zal wel argens hoog in de bömen zitten.

De luu uut ‘tdarp konnen briefkes inleveren um an te geven wat zi-j de beste plaatse veur Smokhanne vonnen. Daor kwam uut dat de meeste stemmen wazzen veur ’n plaetsken op de markt bi-j de kerke.
At de plekke bekend wörd zal Smoks Hanne eerst wel effen weer komen kieken en dan pas beslissen of zi-j op de markt wil kommen te staone.

Dus effen geduld nog, zi-j kump wel weer terugge in ’t Darp, hoast zeker wetten.