GRADUS EN D'N GELDERSCHEN TRAM.

Gradus van de Schadde was een neet al te groot, rood an e'lopen kealtjen, dat zich nogal rap mieterig kon maken. In 't darp ston hee dan ok te book as Gradus Potstempel of ok wal d'n Rooien Gradus.

Gradus was den goonsdag al vrog oet de plodden e'kroppen, hee mos met 't meddaguur in Arem veur d'n edelachtbaren verschienen um zien promilage Grolsch in 't blood too te lichten.

Hee had zich veur e'nommen met d'n Gelderschen Tram te goan, want hee had zo 't vermoeden dat hee zien riebewies doar zol motten loaten en dan stoa'j mooi te kieken a'j d'n auto neet meer met weerumme könt nemmen.
Boetendat had 't den goonsdag duftig e'roegiezelt en völle better zol 't neet worden.Gradus glierden op 't darp an en ston um halluf achte al bie de bushalte schuuns tegenoaver d'n Angank.

Toot d'n kastelein um een uur of achte de deure losdeet zach hee Gradus in d'n jachsnee bie de halte stoan vrustern. "Zo, Gradus, ie bunt d'r vandage vrog bi'j, lus ie ne komme koffie ?"
"Dat zol d'r wal ingoan", zei Gradus, " moar ik stoa op de busse te wochten, ik mot vanmeddag in Arum wean".
"Noa, dan kö'j wisse nog wal ne komme nemmen", zei d'n kastelein, "Dee busse steet nog in Dörkum, gin deurkommen an, kan neet veur- of achteroet deur den verrekten roegiezel".
Dat vroor Gradus Potstempel op d'n emmer, en hee maken zich al richtig helleg." At 't neet anders is, doot d'r mien dan moar ene in, Borkelose moate at 't kan ", reep Gradus en hee stiefelden op d'n Angank an. Ne halve kanne koffie later zat d'n Potstempel nog an 't töäfelken en nog immer gin busse te zeen.

Entelijks, noa een dik uur stopt d'r een groot geal gevaarte bie de halte." Boh foi toch," zei Gradus, onderwiel peers van gif, " mien duch, ik zol te late in Arum kommen met dee fratsen van d'n Gelderschen Tram".
Hee bedankten d'n kastelein veur de koffie, trok de krage op 't ende en gengelden op de busse an.

D'n buschauffeur had de deure al een hötjen losstoan en reep Potstempel too wat meer gank te maken, "scheet toch op keal, 't wördt hier kalt en ik hebbe neet alle tied van de welt a'j dat soms meent".
Gradus, toch al neet d'n makkelijksten, wier nog peerser en reep onder 't goan : "'t Is geal en een dikke vief kwateer te late ".
D'n buschauffeur den zich ok neet veur een gat leet vangen, snauwden terugge:, " 't Is peers en mot nog een uur wachten". Sissens slotten de deurn zich veur Gradus zien snoetwark en de busse vertrok zonder Gradus van de Schadde.

Bie d'n Angank is d'r nog wekken oaver e'lachen hoo't Potstempel was vergoan. Gradus is den goonsdag bie verstek veroordeilt.

Bernard Bonenkamp ne Old Grolschen in Diem