Welkom in het

LEESZAAL - ARCHIEF

Hier vindt u verhalen van Wim Bluemers

VERDACHT PAKKETJE

Enige jaoren geleden, en dan praot ik wéér oaver de veurige eeuw, wodd`n d`r hier in Vodd`n en wie`je umstrek`n ook wel us dingen gedaon woarvan ie`j later bie`j o`w zelf dachten, boh foi toch, da`s meer geluk dan wiesheid hebben!

Welno`w zo ging dat met Ganzenpen de afgelopen wekke wél. Deur blie`jheid, vanweage de trouwerie`je, oavermand mos en zol d`r iets gebeuren wanneer de jonggetrouwden weerumme kwamen vanuut `t verre oosten.
Vanuut Vodd`n wazz`n d`r al van alles geregeld richting Bali. Drankjes, hapjes en völle meer. Zelfs bie`j de bali op Bali en de deur van `t appartement wazz`n `t duudelijk dat de luu uut Vodd`n kwamen.

Maor toch, ze`j mot weerumme komm`n en dat breg Ganzenpen op `t idee um manges de veurbereidingen te treffen um `n baoge te maken die demontabel is en dus makkelijk en discreet te vervoeren is. Van gries pvc (rond 32) wodd`n de baoge gemaakt en wel zo, dat he`j gemakkelijk in de auto kan. De baoge bestond uut acht stukken piep met zo hier en doar `n mofk`n of `n bochj`n. Dat alles bie`j mekare gebonden met `n old leren riemk`n. De slingers d`r maor niet umheer dat kan op Schiphol wel.

Veur onderweg `n kanne met koffie en `n toet`n met krentenbollekes, want uutendelijk is `t toch `n schoolreisj`n. Onderweg `n maol of wat in de file gestaon dut de klokke raps richting ankomsttied gaon.

Eindelijk doar bu`w dan bie`j de parkeerplaatsen. Goed kieken woar a`j staot, bie`j "Koe 1 rie`je vier". Verduld aardig van die`j luu dat ze `n betj`n rekkening holt met de luu uut Vodd`n en umstreken, al is `t maor um de taal alleen te doen.

Raps de bene d`rin en dat op de ankomsthal an. De luu kiekt vremd naor Ganzenpen en mompelt allemaaol iets tegen mekare. Toen ik de roltrap nomme en ie`j komt langzaam met o`w snoet`n boaven de vloer uut dan zie`j meteen verschrikte gezicht`n. Op ens wordt `t mien duudelijk, den bos grieze piepen liekt verduld iets op zo`n ratelpistölleken van Rambo.

D`r begint al luu met tillefoontjes te griepen en `n endj`n wieter, net veurdat ik de automatische anti-loopband wil nemm`n, hölt mien `n beveiligingskear`l an. Heeft u een legitimatiebewijs bij u? Jao zeker dat heb ik! Niks doen, laot um maor gewodd`n dus wiez`n naor heel andere dingen. Ik vroeg u om een legitamietiebewijs, begon he`j te nöster`n. No`w vaderman, ie`j vrogen mien of ik d`r ene had, niet of ie`j um mochten zien. Doar ha`k um an de grepe! Gelukkig hef Ganzenpen zo`n ding uut de auto met genomm`n en löt `t ding zien. Waar komt u vandaan, vróg de kear`l wieter. "Ik komme uut Vodd`n! Wat zegt u? Ik komme uut Vodd`n, dat ligt 2 kilometer veur de Kranenbarg. De kear`l kik asof he`j water zut branden. Ik denk bie`j mien zelf, ie`j mot die`j luu ook nog niet wiezer maken dat ze bunt, want veur `tzelfde geld zuukt ze ons hier op! Wat draagt u daar bij zich? Oh, da`s `n plastiek`n boage, den wi`k drek opzetten bie`j de Ankomstgate, ie`j wet wel, da`s doar woar de luu deur de roete konn`n zien of ze`j d`rankomt en a`j metloopt ku`j drek zien ho`w ik dat ding in mekare zet. Ik til `t ding op en wil um laot`n zien da`j in`t lange deur de piepen hen kunt kiek`n. He`j dut verschrikt `t stap achterwearts en pleart met grote stappen weer wieter.

Dan maor weer verder en uutendelijk komm`n wie`j bie`j de ankomstgate. Eerst `t busken piepen op de grond fotograferen en vervolgens `n foto maken van `t scherm met de ankomsttieden. Al raps krie`j meer ruumte en de luu kiekt o`w an of ze `t in Keulen heurt donderen, terwijl ik toch écht gin vremde uutstraling in de snoete heb. Strakke snoet`n met gin enkele glimlach.

Endelijk toen Ganzenpen de kaart met "Hulde aan het bruidspaar" an de boage hing wodd`n de snoeten vriendelijker. Wachten, wachten en nog ens wachten en dan eindelijk doar komt de jongeluu an!!! Raps met de boage `t verboden gebied in en nog veur dat d`r andere luu deurkunt steet de boage veur de uutgang. Kalmte manen naor de vremde luu die`j in ens nao `n vlucht van 16 uur haost begint te kriegen. Eerst `n paar foto`s maken en dan pas de boage weghalen.

Toen ik de boage weer uutmekare ging halen keken d`r luu, die`j `t inmekare zetten niet gezien hadd`n, vremd met spannende snoet`n. De piepkes weer bie`j mekare en `t lear`n riemk`n d`r weer umhen en dan maor terug naor de parkeerplaats Koe 1 rie`je vier.

Onderweg vrög mien nog een vremd uutziende kear`l ho`w he`j bie`j "wood`n shoe 1 rie`je drie"kan komm`n. Ik heb um `t adres van `n klompenmaker van de Keyenbarg gegeven, maor doar zag he`j de humor niet van in, maor dat Ganzenpen daor zelf anders oaver dech dat is zeker en veur de rest `n toet`n vol groet`n.