Welkom in het

LEESZAAL - ARCHIEF

Hier vindt u verhalen van Gait den Strieker ofwel Gerbert Abbink.

At ze vieftig jaor bunt eworden begint de olde voetballers al te praoten over, vrogger was’t völle better. Maor is dat wel waor?

’t Veld,

’n Gewone weide waorin de beesten vake nog uut-ejog mosten worden en de flatsen op-eruumd werden deur de boer die dat de dag daorveur vergetten.was.
De strepen wazzen nauweluks te ziene en mos der ‘n penantie enommen worden dan treaden de scheidsrechter de elfmeter af.
De netten wazzen eknupt van touw en loodzwoar.Umdat ze nooit goed dröge werden,ruuken i-j ze van de wiete al deur de muffe geur.
Dat de doelpäöle nog van holt wazzen en vierkant,zult völle blagen niet meer wettten.
In de winter wazzen de velden vake ene modderpoele ,veural veur de kool was ’t een troep wat sommige kiepers wel lekker vonnen. Altied better dan ’n keiharde weide.

Kleedhökken,

Vake mos i-j ow in ’n stal of op ’n daele umkleden en kwam ’t veur dat ’n paerd de bokse an- efretten had. ’t Was al ’n luukse at der een betonnen höksken ston waor a-j nog ’n betjen bescherming hadden.’n Uitzondering wazzen b.v de kleedkamers van H en K(Hummel en Keppel),an de grote weg naor Drempt,tegen aover’t Swaentje.
Daor hadden ze ’n ruumte met zo’n hevelpompe, waor ’t kolde water mos worden op-epomp en dat dan naor’n douchkop ging. Meestal was de jongste spöller de klos en mos hi-j an de pompe staone.
Dit spöllen zich af in de jaoren vieftig. Op de meeste velden ston ’n drinkbak in de hoek van de weide waoruut ’t water met ’n afwasteiltje mos worden ehaald. Zo’n zwengelpompe zörgen veur de anvoer.
I-j kunt ow veurstellen dat de meeste spöllers de kleren weer antrokken en zich thuus gingen wassen.
Trainingspakken kennen ze ok niet,vake werden de voetbalkleren al thuus an-etrokken, allene de voetbalschoenen werden nog in de tasse met-enommen.
Ok de scheidsrechters hadden gin speciale behandeling. Zi-j mochten zich bi-j de luu in de buurte umkleden;of in de kökken van ’t cafe. Opvallend was toendertied dat de velden vake bi-j’n cafe laggen. Kon gebeuren dat bi-j ’n wedstrijd den werd verloren,de kleren van de scheidsrechter op de stoepe werden neer-elegd. Ok vrogger had de scheidsrechter ’t altied edaone.

Kleding,

De voetballers hadden hemden en boksen in de clubkleuren an,die toen zelf an-schaft mosten worden. Toen hadden de boksen nog ’n achtertesse waorin ’n zakdoek zat, zo da-j niet dat gesnotter zaggen wat ze now doet. Enkele spöllers hadden been beschermers achter de kousen estokken, maor die wazzen ze elke kere weer kwiet. De kiepers hadden vake dikke truien an, een legerpetje veur de zonne en bi-j slecht weer een paar gebreide vingerhandschoenen an.

Schoene,
Zwarte leren schoene van ’t merk” Quick” uut Hengel. Leren noppen met spiekers vast ezet,zörgen regelmatig veur strepen oaver de benen van de tegenstander. Veur de wedstrijd ging i-j dan effen met de noppen oaver de stenen um die spiekers wat weg schoeren. Bi-jzunder wazzen de staolenneuzen van de schoene.Daor ko-j prima met punteren.

Training,

Ene avond in de wekke kwam der ’n trainer um ow wat bi-j te spiekeren.Begon vake met gymnastiek oefeningen en daornao wat oefeningen met de bal. A-j as vereniging vief ballen hadden, dan hadden zi-j ’t goed veur mekare.De trainer had toen niet völle inbreng bi-j de opstelling van ’t elftal.

De Bal,

Grote zwaore leren ballen met veters dicht-eknupt.Bi-j vri-je trappen of bi-j ’t uutschieten, mos i-j goed kieken of de veters an de goeie kant zatten.A-j bi-j ’n kopbal net die veters op de kop kregen, jökken dat wel. De binnenbal was van gummie en raken nog wel us lek. De schoemaker plakken den dan weer en pompen um opgevuul weer op en zetten dan ok de bal nog in ’t vet. I-j kunt ow veurstellen dat bi-j reagen die ballen loodzwaor wazzen.Vlak veur de wedstrijd werden de ballen nog ens op-epompt met zo’n handpumken.

Elftal commissie,

Op woensdag aovend kwammen’n stel keals bi-j mekare in ’n Darpscafe, meestal de stamkroeg van de vereniging. Daor werd ’t elftal samen esteld en de opstelling werd in ’n kasjen in het darp op-ehangen. Daor werd ok de tied an-egeven, net als ’t vervoer bi-j uutwedstri-jden
’t Bestuur had ok nog wat in de melk te brokkelen wat de taktiek mos worden, samen met de oldere spöllers. Verzörgers wazzen der niet ,effen met de benen in de drinkbak in de hoek van de weide.Wieter ging i-j naor de huusdokter, den dan bepalen wat of der mos gebeuren.

Kantine,
Dat kennen wi-j toen nog niet in die tied,ieder darp had ’n stamkroeg waor a-j nao de wedstrijd nog effen ’n biertje konnen nemmen. De meeste spöllers gingen naor huus um zich te wassen en gingen dan niet meer naor de kroeg. Dat is now wel anders. Better?

Uutwedstrijden,

Op de fietse, soms met auto’s van ’t bestuur en heel af en toe,a-j wiet weg mosten, werd der ’n bus ehuurd.Daor mos ie dan as spöller ’n kleinigheid an bi-jdragen.Ok lopen was der ’n kere bi-j,toen de autoloze zondag werd in-evoerd.De GTW - bus reed b.v naor Doesburg,maor a-j dan in Angerlo mosten spöllen dan mos i-j dat stuk lopen.
Meestal kwammen de spöllers in ’t darp bi-j mekare um van daor uut te vertrekken.