Deze pagina is vernieuwd op 25 oktober 2007
DE WILLE VAN...... Enige jaoren geleden, en dan praot ik weer oaver de veurige eeuw, was d`r bie`j völle huusgezinnen wel enige bedrievigheid in de vorm van, `n min of meer kleine(re) ondernemming. Zo ook an de Reu`lseweg hier tegen de Leuke. Op rie`je vanaf Mies Hartelman ( kleine winkeltje) richting darp komm`n wie`j langs Hartman de bakker (met de ijsco karre) en dan op 30 `t huusken waor holten spöllegoed wodd`n verkocht vanuut de veurkamer en kabels ontvlochten vanuut `t achterland waorvan nóg af en toe `n knuppe draod te vinden is wanneer d`r een klotefonia in de grond gezet wordt tegen de holtwal, vervolgens `t pension van Wies en dan `t winkeltje en smederie`je van de old`n Smid waormee ik dan bun bie`j de titel van dit vertelseltje. In die tied ( eerste helft veurige eeuw) was `t net as tegenswoordig gebruuk`lijk dat de luu af en toe bie`j mekare komt veur `n praotje. Toen Wies nog leaven nuum`n ik dat `n draodpraotje, Wies en ik stonden dan soms wel `n uur an de weidedraod te praoten oaver alles en nogwat. Zo ook bie`j d`n old`n Smid, op een mooie dag in de zommer steet de deure van de smederie`je lös en heuren ie`j op de klinkers van de Reu`lseweg `t gebater van de hamer op `t aambeeld. Derk van de Krop is vertegenwoordiger bie`j `n krante en löt zien snoete an de binnenkante van de smederie`jdeur ziene. Umdat de uurlonen destieds niet zo hoge lagen kon d`n old`n Smid effen stoppen met `t kloppen en heuren de verhalen van Derk van de Krop an.
Derk van de Krop hef al een hele tied zien verhaal `daon toen d`n old`n Smid, licht vluuk`nd, kump met `t nieuws dat d`r ene is oaverleden en dat mot um zichtbaor iets gedaon hebben zo geet `t verhaal. Naodat d`r niks dan goeds is verteld oaver de oaverledene wil Derk van de Krop nog effen `t laatste woord en zegt: "Och waarde vriend de Smid, `t is de wille van God, laot wie`j maor zeggen". En dat had Derk better niet kunnen zeggen, want wat gebeurt d`r. D`n olden Smid haalt, vluukend de grote hamer van `t aambeeld, zwaait met völle kracht, nog harder vluukend, met de hamer in de loch en zegt: "As ik o`w no`w (VLUUK) met disse hamer veur de kop poffe, is dat dan ( VLUUK) ok de wille van God? En met `n rapse pas is Derk van de Krop naor de Reu`lseweg vertrokken en hef zich daor `n hele tied niet meer laoten zien.
En ok dat is waor gebeurd in de buurte van De Leuke.
