Slachtmaond

Enige jaoren geleden, en dan praot ik wéér oaver de veurige eeuw, liep ik as kleine jongen graag bie`j de slager an huus umdat d`r altied wel iets bi`jzunders te doen was. Mien belangstelling ging veural uut naor `t slacht`n van varkens en koeien.

Stel o`w dan veur: Achter de rokerie`je stonden regelmaotig beesten te wachten op de slager die`j gin medelie`jen mos kennen in zien werk. Touw achter de hoorns en vast an `n metalen ring die`j an `n haok in de muur gemetseld was. En dan `n tied later kwam de slager. Een extra touw en knuppeltje um de kuur`n van `t beest d`r af te holl`n en vervolgens met de koe naor de slachterie`je. De dubbele deure van de slachterie`je wietwagend lös en zodra `t beest binnen was kwam ik schuchter kiekend in `n korte bokse en te grote laerzen dichter bie`j.

Afhankelijk van de greute van `t beest wodd`n d`r `n patroon in passende kleur in `t masker gedaon en vervolgens wodd`n `t ding midd`n veur de kop gehollen. Dan gelieke met de knal, klappen alle poten in en met `n smak lag `t beest op de grond. Zo snel meugelijk `t bloed d`raf en vervolgens nao enkele gebruukelijke handelingen `t beest in de takel um verder afgemaakt te worden. Tinus, de slager, grip uut de ribbekaste van `t beest `n klodder ingewanden en smit `t bie`j mien precies in de laerze. Frrrlllbbbsss daor ha`k de laerze in ene keer vol. Maor mien an nie`jsgierigheid grenzende belangstelling was d`r niet met afgenomm`n.

Wanneer `t `n keer druk was en d`r mossen achter mekare varkens geslacht wodd`n, dan kon `t gebeuren dat de varkens in `n ruumte naost de rookerie`je stonden te wachten. Umdat `t toch wel völle werk was um steeds maor weer de slachterie`je schoon te maken, wodd`n de varkens op `n bi`jzundere wieze beschermd tegen een bloederig anzien van de slachterie`je. Zodra d`r weer `n varken uut de rookerie`je kwam was `t `n gebleer van jewelste, `t huul`n deur de peppels! Wat deed de slachter? Ik praote nog steeds uut de tied toen poep met `n lange oe werd geschreven en de honden nog met gemak uut de konte blaften. De varkens kregen een grote zinken emmer oaver de kop en wodd`n op die wieze de slachterie`je binnen gehaald zodat ze niet wild wodd`n van al `t bloed.